സ്പീക്കര്‍ എ എന്‍ ഷംസീറുമായി ബന്ധപ്പെട്ട വിവാദത്തില്‍ നടന്‍ സലീം കുമാര്‍ നടത്തിയ പരാമര്‍ശത്തിന് മറുപടിയുമായി വിദ്യാഭ്യാസ വകുപ്പ് മന്ത്രി വി ശിവന്‍കുട്ടി. ദേവസ്വം മന്ത്രി കെ രാധാകൃഷ്ണനെ മിത്തിസം വകുപ്പ് മന്ത്രിയെന്നും നടവരവിനെ മിത്ത് മണിയെന്നും പരാമര്‍ശിച്ച സലീം കുമാറിന്റെ നടപടി ഒട്ടും ശരിയായില്ലെന്നും സലീം കുമാറിനെപ്പോലൊരാള്‍ ഇത്തരം പരാമര്‍ശം നടത്തരുതായിരുന്നെന്നും മന്ത്രി വി ശിവന്‍കുട്ടി പറഞ്ഞു. കെ രാധാകൃഷ്ണന്‍ ജനങ്ങള്‍ മികച്ച ഭൂരിപക്ഷത്തില്‍ ജയിപ്പിച്ച ജനനേതാവാണെന്നും ഒരു കാര്യവുമില്ലാതെയാണ് സലീം കുമാര്‍ അദ്ദേഹത്തെ വിവാദത്തിലേക്ക് വലിച്ചിഴച്ചതെന്നും ശിവന്‍കുട്ടി പറഞ്ഞു. സലീം കുമാര്‍ പരാമര്‍ശം പിന്‍വലിക്കുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മാറ്റങ്ങള്‍ തുടങ്ങേണ്ടത് ഭരണസിരാകേന്ദ്രങ്ങളില്‍നിന്നാണെന്നും മിത്തും റിയാലിറ്റിയും തമ്മിലുളള സംഘര്‍ഷം നിലനില്‍ക്കുമ്പോള്‍ റിയാലിറ്റിയുടെ വിജയത്തിനുവേണ്ടി ദേവസ്വം വകുപ്പ് മന്ത്രിയെ മിത്തിസം വകുപ്പ് മന്ത്രിയെന്നും ഭണ്ഡാരത്തില്‍നിന്നും കിട്ടുന്ന പണത്തെ മിത്തുമണിയെന്നും വിളിക്കണം എന്നുമാണ് സലീം കുമാര്‍ പറഞ്ഞത്. വിദ്യാര്‍ത്ഥികളോട് സംവദിക്കവേ ഗണപതിയെക്കുറിച്ച് സ്പീക്കര്‍ എ എന്‍ ഷംസീര്‍ നടത്തിയ പരാമര്‍ശമാണ് വിവാദമായത്. വിദ്യാര്‍ത്ഥികളില്‍ ശാസ്ത്രാവബോധം വളര്‍ത്തുന്നതിനെക്കുറിച്ച് സംസാരിക്കവേ ഗണപതി മിത്താണെന്ന് പറഞ്ഞതാണ് ബിജെപി, എന്‍എസ്എസ് അടക്കമുളള സംഘടനകളെ ചൊടിപ്പിച്ചത്. ഷംസീറിനെതിരായ പ്രതിഷേധം ശക്തമായ പശ്ചാത്തലത്തിലായിരുന്നു സലീം കുമാറിന്റെ പ്രതികരണം.
