ലക്നൗ: ഉത്തര്പ്രദേശില് മുസ്ലീം വിദ്യാര്ത്ഥിയുടെ മുഖത്തടിക്കാന് സഹപാഠികള്ക്ക് നിര്ദേശം നല്കുന്ന അധ്യാപികയുടെ വീഡിയോ വൈറലായതിനുപിന്നാലെ പ്രതികരണവുമായി മുന് മുഖ്യമന്ത്രിയും സമാജ് വാദി പാര്ട്ടി അധ്യക്ഷനുമായ അഖിലേഷ് യാദവ്. ബിജെപി പടര്ത്തുന്ന വിദ്വേഷത്തില്നിന്ന് അധ്യാപകരും മുക്തരായിട്ടില്ലെന്നാണ് വീഡിയോ തെളിയിക്കുന്നതെന്നും വിദ്വേഷം പടര്ത്തുന്ന ബിജെപിയുടെ അജണ്ടയുടെ ഫലമാണ് വിദ്യാര്ത്ഥികളോട് സഹപാഠിയെ അടിക്കാന് അധ്യാപിക ആവശ്യപ്പെടുന്നതെന്നും അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
'മുസഫര് നഗറില്നിന്നുളള ഒരു വൈറല് വീഡിയോയില്, ഒരു അധ്യാപിക ന്യൂനപക്ഷ വിഭാഗത്തില്പ്പെട്ട ഒരു കുട്ടിയെ മറ്റ് കുട്ടികളെ ഉപയോഗിച്ച് മര്ദ്ദിക്കുന്നത് കണ്ടു. ബിജെപി സര്ക്കാര് തങ്ങളുടെ വര്ഗീയ അജണ്ട ശരിയാണെന്ന് തെളിയിക്കാന് ഈ വീഡിയോ ജി 20 യോഗത്തില് കാണിക്കണം. ഇത്തരം അധ്യാപകര് അധ്യാപക സമൂഹത്തിന് തന്നെ കളങ്കമാണ്. ഈ അധ്യാപികയ്ക്ക് ശിക്ഷ ഉറപ്പാക്കാനായി രാജ്യത്തെ മുഴുവന് അധ്യാപകരും ശബ്ദമുയര്ത്തണം'- അഖിലേഷ് യാദവ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക