മഹാരാഷ്ട്രയില് ബഹുനില കെട്ടിടം തകര്ന്നുണ്ടായ അപകടത്തില്, അവശിഷ്ടങ്ങള്ക്കിടയില് 19 മണിക്കൂറോളം കുടുങ്ങിക്കിടന്ന 4 വയസ്സുകാരനെ രക്ഷപ്പെടുത്തി. ചൊവ്വാഴ്ച ഉച്ചയ്ക്ക് ഒരു മണിയോടെയായിരുന്നു മുഹമ്മദ് ബംഗിയെ അവശിഷ്ടങ്ങളില് നിന്ന് പുറത്തെടുത്തത്. കുട്ടിയ്ക്ക് നിസ്സാര പരിക്കുകള് മാത്രമേ ഉണ്ടായിരുന്നുളളു.
കുട്ടിയെ രക്ഷപ്പെടുത്തി 30 മിനിറ്റിനുശേഷം, മുഹമ്മദിന്റെ അമ്മയായ നൗഷിന്റെ ജീവനിലാത്ത ശരീരം രക്ഷാപ്രവര്ത്തകര് കണ്ടെടുത്തു. പിന്നീട് സഹോദരിമാരായ ഐഷ (6), റുക്കയ്യ (2) എന്നിവരുടെ മൃതദേഹങ്ങളും കണ്ടെത്തി.
ലോക്ക്ഡൗണ് തുടങ്ങിയതിന് ശേഷം ഇവര് കുടുംബത്തോടെ സ്വന്തം ഗ്രാമത്തിലേക്ക് മാറിയിരുന്നു. കുട്ടികളുടെ ഓണ്ലൈന് ക്ലാസുകളെ ബാധിക്കാതിരിക്കാന് ഏതാനും ദിവസങ്ങള്ക്ക് മുമ്പാണ് ഇവിടെ മടങ്ങിയെത്തിയതെന്ന് മുഹമ്മദിന്റെ അമ്മാവന് ബഷീര് പാര്ക്കര് പറഞ്ഞു. മുഹമ്മദിന്റെ പിതാവ് ദുബായിലാണ് ജോലി ചെയ്യുന്നത്.