ഡല്ഹി: ഇന്ത്യയുടെ നാല്പ്പത്തിയെട്ടാമത് ചീഫ് ജസ്റ്റിസായി എന്വി രമണ ചുമതലയേറ്റു. കൊവിഡ് നിയന്ത്രണങ്ങളുളളതിനാല് രാഷ്ട്രപതി ഭവനില് നടന്ന ലളിതമായ ചടങ്ങിലാണ് എന്വി രമണ സത്യപ്രതിജ്ഞ ചെയ്തത്. രാഷ്ട്രപതി രാം നാഥ് കൊവിന്ദ് സത്യവാചകം ചൊല്ലിക്കൊടുത്തു. 2022 ആഗസ്റ്റ് വരെയാണ് ചീഫ് ജസ്റ്റിസായി എന്വി രമണയുടെ കാലാവധി. ജമ്മു കശ്മീര്, സിഎഎ-എന്ആര്സി, റഫാല് അടക്കം നിരവധി കേസുകള് എന്വി രമണ പരിഗണിക്കും.
ആന്ധ്രപ്രദേശിലെ പൊന്നാവരം ഗ്രാമത്തിലെ ഒരു കര്ഷക കുടുംബത്തിലാണ് എന്വി രമണ ജനിച്ചത്. ആന്ധ്രയില് നിന്നുളള രണ്ടാമത്തെ ചീഫ് ജസ്റ്റിസാണ് എന്വി രമണ. 1966 മുതല് 67 വരെ ചീഫ് ജസ്റ്റിസായിരുന്ന ജസ്റ്റിസ് കെ. സുബ്ബറാവുവാണ് ആന്ധ്രയില് നിന്നുളള ആദ്യത്തെ ചീഫ് ജസ്റ്റിസ്.
2000-ലാണ് ആന്ധ്രപ്രദേശ് ഹൈക്കോടതിയുടെ സ്ഥിരം ജഡ്ജിയായി എന്വി രമണയെ നിയമിച്ചത്. 2014-ല് അദ്ദേഹത്തിന് സുപ്രീംകോടതിയിലേക്ക് സ്ഥാനക്കയറ്റം നല്കി. അഭിഭാഷകന് എന്ന നിലയില് ആന്ധ്രപ്രദേശ് ഹൈക്കോടതി, സെന്ട്രല് അഡ്മിനിസ്ട്രേറ്റീവ് ട്രിബ്യൂണല് തുടങ്ങി വിവിധ സര്ക്കാര് സ്ഥാപനങ്ങളിലും എന്വി രമണ സേവനമനുഷ്ടിച്ചിട്ടുണ്ട്.