ഡല്‍ഹി: ചാനല്‍ ചര്‍ച്ചക്കിടെ ബാബാ രാംദേവിന്റെ വായടപ്പിച്ച് ഡോ. ജയേഷ് ലെലെ. ആജ്തക് ചാനലില്‍ നടന്ന ചര്‍ച്ചയില്‍ താന്‍ സംസാരിക്കുന്നതിന്റെ ഇടയ്ക്ക് കയറി സംസാരിക്കാന്‍ തുടങ്ങിയതാണ് ബാബാ രാംദേവിനോട് ലെലെ രൂക്ഷമായി സംസാരിക്കാനിടയാക്കിയത്. 'മിണ്ടാതിരുന്നോണം, ഞാന്‍ സംസാരിക്കുന്നതിനിടയ്ക്ക് നിങ്ങളുടെ ശബ്ദം ഉയരരുത് എന്ന് ഡോക്ടര്‍ കടുപ്പിച്ച് പറയുന്ന വീഡിയോ ഇതിനകം സമൂഹമാധ്യമങ്ങളില്‍ വൈറലാണ്.
ഇന്ത്യന്‍ മെഡിക്കല്‍ അസോസിയേഷന്റെ സെക്രട്ടറി ജനറലാണ് ജയേഷ് ലെലെ. ആലോപ്പതി മരുന്നുകളുടെ ഫലപ്രാപ്തിയെ വിമര്‍ശിച്ചുകൊണ്ടുളള ബാബാ രാംദേവിന്റെ സംസാരമാണ് ലെലെയെ പ്രകോപിപ്പിച്ചത്. അലോപ്പതി മരുന്നുകള്‍ കഴിച്ചതുകൊണ്ടാണ് രാജ്യത്തെ കൊവിഡ് ബാധിതര്‍ മരണപ്പെടുന്നത് എന്നായിരുന്നു ബാബാ രാംദേവിന്റെ വിവാദ പ്രസ്താവന. പ്രസ്താവന വിവാദമായതോടെ രാജ്യത്തെ നിരവധി ഡോക്ടര്‍മാരുടെ സംഘടനകളാണ് രാംദേവിനെതിരെ രംഗത്തെത്തിയത്. പ്രതിഷേധങ്ങള്‍ കനത്തതോടെ കേന്ദ്രസര്‍ക്കാരും ബാബാ രാംദേവിനെ തളളിപ്പറഞ്ഞു. തുടര്‍ന്ന് പ്രസ്താവന പിന്‍വലിച്ച് മാപ്പുപറയുകയായിരുന്നു ബാബാ രാംദേവ്.
