ഡല്ഹി: ഇന്ത്യയില് ആദ്യമായി കണ്ടെത്തിയ കൊവിഡിന്റെ വകഭേദമായ, ബി. 1.617നെ ഡെല്റ്റ എന്ന് പേര് നല്കി ലോകാരോഗ്യ സംഘടന. നേരത്തെ രാജ്യത്ത് കണ്ടെത്തിയ കൊവിഡ് വകഭേദത്തിന് കാപ്പ എന്ന പേരാണ് ലോകാരോഗ്യ സംഘടന നല്കിയിരിക്കുന്നത്.
കൊവിഡ് വകഭേദങ്ങളെ ശാസ്ത്രീയ നാമം ഉപയോഗിച്ച് വിശേഷിപ്പിക്കുന്നത് ബുദ്ധിമുട്ടായതിനാല് അവ കണ്ടെത്തിയ രാജ്യങ്ങളുടെ പേരിലാണ് ഇതുവരെ അറിയപ്പെട്ടിരുന്നത്. എന്നാല് ഇതിനെതിരെ രാജ്യങ്ങള് എതിര്പ്പ് പ്രകടിപ്പിച്ചിരുന്നു. കൊവിഡ് വകഭേദങ്ങള്ക്ക് ഗ്രീക്ക് അക്ഷരമാലയിലെ ആല്ഫ, ബീറ്റാ, ഗാമ എന്നിങ്ങനെയാണ് പേരുകള് നല്കാന് ഐക്യരാഷ്ട്രസഭ തീരുമാനിച്ചിരിക്കുന്നത്. എന്നാല് ശാസ്ത്രലോകത്ത്, കൊവിഡ് വകഭേദങ്ങളുടെ ശാസ്ത്രീയ നാമം തന്നെയായിരിക്കും ഉപയോഗിക്കുക.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇന്ത്യയില് കണ്ടെത്തിയ വകഭേദത്തില് ലോകാരോഗ്യ സംഘടന ആശങ്ക രേഖപ്പെടുത്തിയതിനു പിന്നാലെ 'ഇന്ത്യന് വകഭേദം' എന്ന് വിശേഷിപ്പിക്കുന്നതിനെതിരെ കേന്ദ്ര സര്ക്കാര് രംഗത്തു വന്നിരുന്നു. ബ്രിട്ടന്, ബ്രസീല്, ദക്ഷിണാഫ്രിക്ക എന്നിവിടങ്ങളില് കണ്ടെത്തിയ വകഭേദങ്ങളിലും ലോകാരോഗ്യ സംഘടന ആശങ്ക രേഖപ്പെടുത്തിയിരുന്നു. ഇന്ത്യയില് ആദ്യമായി കണ്ടെത്തിയ ഡെല്റ്റ വകഭേദം ഇതുവരെ 53 രാജ്യങ്ങളില് റിപ്പോര്ട്ട് ചെയ്തതായി ഔദ്യോഗികമായി സ്ഥിരീകരിച്ചിട്ടുണ്ട്.