തിരുവനന്തപുരം: നിയമസഭാ കയ്യാങ്കളിയില് വിദ്യാഭ്യാസമന്ത്രി വി. ശിവന്കുട്ടിക്കെതിരെ രൂക്ഷ വിമര്ശനവുമായി പി. ടി. തോമസ് എംഎല്എ. ആന കരിമ്പിന്കാട്ടില് കയറിയതുപോലെ എന്ന പഴമൊഴിക്കു പകരം ശിവന്കുട്ടി നിയമസഭയില് കയറിയതുപോലെ എന്നാണ് പുതുമൊഴി എന്ന് പി. ടി. തോമസ് പറഞ്ഞു.
സ്പീക്കറുടെ കസേര മറിച്ചിടുകയും കമ്പ്യൂട്ടറും കണ്ണില് കണ്ടതെല്ലാം തല്ലിപ്പൊട്ടിക്കുകയും ചെയ്തു. ലക്ഷങ്ങളുടെ നഷ്ടമാണ് വരുത്തിവച്ചത്. തെരുവുഗുണ്ടകളെ നാണിപ്പിക്കുന്ന വിധത്തിലാണ് സിപിഎം നിയമസഭയില് പെരുമാറിയതെന്നും പി.ടി തോമസ് പറഞ്ഞു. കേരളത്തിന്റെ യശസ്സ് സിപിഎം കളങ്കപ്പെടുത്തി, വിദ്യാഭ്യാസമന്ത്രിയായ വി. ശിവന്കുട്ടി ഉള്പ്പെട്ട നിയമസഭാ കയ്യാങ്കളിക്കേസ് കേരളത്തിന്റെ ചരിത്രത്തിലെ കറുത്ത അധ്യായമാണ് എന്നും അദ്ദേഹം കൂട്ടിച്ചേര്ത്തു
അഴിമതിക്കാരനായ കെ.എം മാണിയെ ബജറ്റ് അവതരിപ്പിക്കാനനുവദിക്കില്ലെന്നാണ് സിപിഎം പ്രഖ്യാപിച്ചത് എന്നാല് കോടതി വിധി കേട്ട് ഏറ്റവും കൂടുതല് സന്തോഷിച്ചിരിക്കുക മാണി സാറിന്റെ ആത്മാവായിരിക്കും- പി. ടി. തോമസ് പറഞ്ഞു. സഭയില് ഇത്തരത്തില് പെരുമാറിയ ശിവന്കുട്ടി എങ്ങനെയാണ് കുട്ടികള്ക്ക് മാതൃകയാവുകയെന്നും അദ്ദേഹം ചോദിച്ചു.