കൊറോണ വൈറസ് പ്രതിരോധത്തിന്റെ ഭാഗമായി അസുഖ ബാധിതർ സഞ്ചരിച്ച വഴികളെ കുറിച്ച് മുന്നറിയിപ്പ് നൽകുന്ന മൊബൈൽ ആപ്ലിക്കേഷൻ തയ്യാറാക്കുന്നു.കേന്ദ്ര സർക്കാറാണ് ഇതിനായുള്ള പദ്ധതി ഒരുക്കുന്നത്. വൈറസിന്റെ സാമൂഹ്യ വ്യാപനം തടയാനാണ് മൊബൈൽ അപ്ലിക്കേഷൻ തയാറാക്കുന്നത്.
ഇന്ത്യയിലെ മുഴുവൻ പ്രാദേശിക ഭാഷയിലും അപ്ലിക്കേഷൻ പുറത്തിറക്കും. മലയാളത്തിലും മൊബൈൽ അപ്ലിക്കേഷൻ ഉണ്ടാകും. ആപ്ലിക്കേഷന്റെ മാതൃക നിതി ആയോഗും ഇലക്ട്രോണിക്സ് മന്ത്രാലയവും ചേർന്ന് തയാറാക്കിക്കഴിഞ്ഞു. ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്റെ ഡേറ്റയുമായി ബന്ധിപ്പിച്ചാണ് ആപ്ലിക്കേഷൻ രൂപപ്പെടുത്തുക. നിലവിൽ വൈറസ് ബാധ സ്ഥിരീകരിച്ചിട്ടുളളവരുടെ വിവരങ്ങൾ ഇതിൽ ഉണ്ടാകും.
സിംഗപ്പൂർ വിജയകരമായി ഇത്തരം അപ്ലിക്കേഷൻ തയ്യാറാക്കിയിരുന്നു. സമൂഹ വ്യാപനം തടയാൻ സിംഗപ്പൂർ ഫലപ്രദമായാണ് ഈ പദ്ധതി നടപ്പാക്കിയത്. തായ്വാനും സമാനമായ അപ്ലിക്കേഷൻ പുറത്തിയിട്ടുണ്ട്.
ഹോം ക്വാറന്റൈനിലുള്ളവരെ നിരീക്ഷിക്കുന്നതിനാണ് തായ്വാൻ അപ്ലിക്കേഷൻ ഇറക്കിയത്. ജിയോ ടാഗിംഗ് അടിസ്ഥാനമാക്കിയാണ് ഈ സംവിധാനം ഒരുക്കിയത് ക്വാറന്റീനിലുള്ള രോഗികൾ നിർദേശങ്ങൾ പാലിക്കുന്നുവെന്ന് ഉറപ്പു വരുത്താൻ ജിയോ ടാഗിംഗ് അടിസ്ഥാനമാക്കി പ്രവർത്തിക്കുന്ന ആപ്ലിക്കേഷൻ തായ്വാനും തയാറാക്കിയിരുന്നു.