തിരുവനന്തപുരം: തനിക്കും കുഞ്ഞിനും നീതി നല്കാതെ ശിശുദിനമാഘോഷിക്കുന്ന സര്ക്കാരിനെ വിമര്ശിച്ച് അനുപമ. എന്റെ കുഞ്ഞിനും വേണം ശിശുദിനം. ഞാനിവിടെ ഇത്രനാളും സമരം ചെയ്തിരിക്കുമ്പോള് എന്റെ കുഞ്ഞിനോട് ഇങ്ങനെ കാണിച്ചവര് അപ്പുറത്ത് ശിശുദിനം ആഘോഷിക്കുകയാണ്. അവര്ക്ക് ഒരു മനസാക്ഷിക്കുത്തുപോലും ഉണ്ടാവില്ലേ- അനുപമ ചോദിച്ചു. ശിശുക്ഷേമ സമിതിക്കുമുന്നിലിരുന്ന് പ്രതിഷേധിക്കുമ്പോള് മുഖ്യമന്ത്രിക്ക് തന്നെ പരിഗണിക്കാതിരിക്കാനാവുമോ എന്നും അനുപമ ചോദിച്ചു. സര്ക്കാരിന്റെ ഭാഗത്തുനിന്നും അനുകൂല നടപടിയുണ്ടാവുമെന്ന് പ്രതീക്ഷിക്കുന്നില്ലെന്നും ഉണ്ടായാല് അത് അംഗീകരിക്കുമെന്നും അനുപമ കൂട്ടിച്ചേര്ത്തു.
കഴിഞ്ഞ കുറച്ചുദിവസങ്ങളായി ശിശുക്ഷേമ സമിതിക്കുമുന്നില് അനിശ്ചിതകാല രാപ്പകല് സമരമിരിക്കുകയാണ് അനുപമ. ശിശുക്ഷേമ സമിതി ജനറല് സെക്രട്ടറി ഷിജു ഖാനെയും സി ഡബ്ല്യൂ സി അധ്യക്ഷയെയും പദവിയില് നിന്ന് നീക്കണമെന്നാവശ്യപ്പെട്ടാണ് അനുപമ സമരം ചെയ്യുന്നത്. വകുപ്പുതല അന്വേഷണമാണ് ഇപ്പോള് നടക്കുന്നത്. ആരോപണ വിധേയരായവര് സ്ഥാനത്ത് തുടരുമ്പോള് അന്വേഷണം അട്ടിമറിക്കാനുളള സാധ്യതയുണ്ടെന്ന് അനുപമ പറഞ്ഞിരുന്നു.
കഴിഞ്ഞ വര്ഷം ഒക്ടോബര് 19-നാണ് അനുപമ ആണ്കുട്ടിക്ക് ജന്മം നല്കിയത്. പ്രസവിച്ച് മൂന്നാം ദിവസം ബന്ധുക്കള് കുഞ്ഞിനെ ബലമായി എടുത്തുകൊണ്ടുപോയി എന്നായിരുന്നു അനുപമയുടെ പരാതി. കുഞ്ഞിനെ മാതാപിതാക്കള് എടുത്തുകൊണ്ടുപോയെന്ന് അനുപമ പേരൂര്ക്കട പൊലീസില് പരാതി നല്കിയിരുന്നു. എന്നാല് ആറ് മാസത്തിനുശേഷമാണ് പൊലീസ് കേസെടുത്തത്. സംഭവത്തില് സിപിഎമ്മിന്റെ പാര്ട്ടീതല അന്വേഷണവും ഇപ്പോള് നടക്കുന്നുണ്ട്.