ഡല്‍ഹി: തെരഞ്ഞെടുപ്പ് തോല്‍വിക്കുപിന്നാലെ മൂന്ന് സംസ്ഥാനങ്ങളിലെ പി സി സി അധ്യക്ഷന്മാര്‍ രാജിവെച്ചു. ഉത്തര്‍പ്രദേശ് പി സി സി പ്രസിഡന്റ് അജയ് കുമാര്‍ ലല്ലു, ഉത്തരാഖണ്ഡ് പി സി സി അധ്യക്ഷന്‍ ഗണേഷ് ഗോഡിയാല്‍, ഗോവ പി സി സി അധ്യക്ഷന്‍ ഗിരീഷ് രാജ ചോടാന്‍കര്‍ എന്നിവരാണ് രാജിവെച്ചത്. തെരഞ്ഞെടുപ്പിലെ തോല്‍വിക്കുപിന്നാലെ കോണ്‍ഗ്രസ് അധ്യക്ഷ സോണിയാ ഗാന്ധി അഞ്ച് സംസ്ഥാനങ്ങളിലെയും പി സി സി അധ്യക്ഷന്മാരോട് രാജി ആവശ്യപ്പെട്ടിരുന്നു. പഞ്ചാബ് പി സി സി അധ്യക്ഷന്‍ നവ്‌ജ്യോത് സിംഗ് സിദ്ദു, മണിപ്പൂര്‍ പി സി സി പ്രസിഡന്റ് നമെയ്‌റക്പം ലോകേന്‍ സിംഗ് എന്നിവരുടെ രാജി സ്ഥിരീകരിച്ചിട്ടില്ല.
അതേസമയം, സംഘടനാ തെരഞ്ഞെടുപ്പിന് മുന്നോടിയായാണ് തീരുമാനമെന്ന് കോണ്‍ഗ്രസ് നേതൃത്വം അറിയിച്ചു. എന്നാല്‍ സംസ്ഥാനങ്ങളുടെ ചുമതലയുളള ജനറല്‍ സെക്രട്ടറിമാരും സഹചുമതലയുളളവരും രാജിവെക്കണമെന്ന് പാര്‍ട്ടിക്കുളളില്‍ ആവശ്യമുയരുന്നുണ്ട്. തെരഞ്ഞെടുപ്പിലെ തോല്‍വിയില്‍ യുപി ചുമതലയുണ്ടായിരുന്ന പ്രിയങ്കാ ഗാന്ധിയടക്കമുളളവരും ഉത്തരാവാദികളല്ലേ എന്നാണ് ഒരു വിഭാഗം ചോദിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യു
ഭരണത്തിലിരുന്ന പഞ്ചാബില്‍ പോലും കോണ്‍ഗ്രസിന് ദയനീയ തോല്‍വിയാണ് നേരിടേണ്ടിവന്നത്. പഞ്ചാബ് മുഖ്യമന്ത്രിയായിരുന്ന ചരണ്‍ജിത് സിംഗ് ചന്നിയും പി സി സി അധ്യക്ഷന്‍ നവ്‌ജ്യോത് സിംഗ് സിദ്ദുവുമടക്കും കോണ്‍ഗ്രസിന്റെ മിക്ക നേതാക്കളും പരാജയപ്പെട്ടു. തെരഞ്ഞെടുപ്പ് തോല്‍വിക്കുപിന്നാലെ തോല്‍വി വിശകലനം ചെയ്യാനായി കോണ്‍ഗ്രസ് അവലോകന യോഗം ചേര്‍ന്നിരുന്നു. അതിനുപിന്നാലെയാണ് പി സി സി അധ്യക്ഷന്മാരോട് രാജി ആവശ്യപ്പെട്ടത്. അതേസമയം, കോണ്‍ഗ്രസ് നേതൃത്വത്തിനെതിരായ ജി 23 നേതാക്കളുടെ വിശാലയോഗം ഇന്ന് നടക്കും. കോണ്‍ഗ്രസിന്റെ തോല്‍വിയില്‍ അസംതൃപ്തരായ കേരളത്തില്‍ നിന്നടക്കമുളള നേതാക്കളാണ് യോഗത്തില്‍ പങ്കെടുക്കുക.
