തിരുവനന്തപുരം: ഒരു പഞ്ചായത്തില് പത്തിലധികം പേര്ക്ക് തെരുവുനായയുടെ കടിയേറ്റാല് ആ മേഖലയെ ഹോട്ട്സ്പോട്ടായി പ്രഖ്യാപിക്കുമെന്ന് മൃഗസംരക്ഷ വകുപ്പ് മന്ത്രി ജെ ചിഞ്ചുറാണി. കുടുംബശ്രീ മുഖേന നടപ്പിലാക്കി വരുന്ന എ ബി സി പദ്ധതി നിര്ത്തിവയ്ച്ചതാണ് തെരുവുനായ ശല്യം വര്ധിക്കാനുളള കാരണമെന്നും പദ്ധതി വ്യാപകമായി നടപ്പിലാക്കാന് കുറച്ചുകൂടി സമയം വേണ്ടിവരുമെന്നും മന്ത്രി പറഞ്ഞു. തെരുവുനായ്ക്കള്ക്ക് പേവിഷബാധ പ്രതിരോധ വാക്സിന് നല്കാനായി നാലുലക്ഷം ഡോസ് ഉടന് വാങ്ങുമെന്നും മന്ത്രി ചിഞ്ചുറാണി അറിയിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
'ഈ വര്ഷം ഏപ്രില് മുതല് രണ്ടുലക്ഷം വളര്ത്തുനായകള്ക്ക് പേവിഷ ബാധ പ്രതിരോധ വാക്സിന് നല്കിയിട്ടുണ്ട്. നാലുലക്ഷം ഡോസ് വാക്സിന് വാങ്ങിയതിനുശേഷം ഈ മാസം ഇരുപതോടെ തെരുവുനായ്ക്കള്ക്കുളള വാക്സിന് യജ്ഞം ആരംഭിക്കും'- മന്ത്രി കൂട്ടിച്ചേര്ത്തു. തെരുവുനായ പ്രശ്നത്തില് സര്ക്കാര് സ്വീകരിച്ച നടപടികള് ഹൈക്കോടതിയെ അറിയിക്കുമെന്ന് തദ്ദേശസ്വയംഭരണ വകുപ്പ് മന്ത്രി എം ബി രാജേഷ് പറഞ്ഞു. ഇതുവരെ ആരോഗ്യവകുപ്പ് 490 ഹോട്ട്സ്പോട്ടുകളും മൃഗസംരക്ഷണ വകുപ്പ് 170 ഹോട്ട്സ്പോട്ടുകളും കണ്ടെത്തിയതായും നായ്ക്കള്ക്ക് വന്ധ്യംകരണ കേന്ദ്രങ്ങള് തുടങ്ങുന്നതിനോട് വിവിധ ജില്ലകളില്നിന്ന് വ്യാപക എതിര്പ്പുയരുന്നുണ്ടെന്നും എം ബി രാജേഷ് കൂട്ടിച്ചേര്ത്തു.