പാലക്കാട്: അട്ടപ്പാടിയില് ആദിവാസി യുവാവ് മധു ആള്ക്കൂട്ട മര്ദ്ദനത്തിനിരയായി കൊല്ലപ്പെട്ട കേസില് പ്രതികളുടെ ജാമ്യം റദ്ദാക്കിയ വിചാരണാക്കോടതി നടപടി ശരിവെച്ച് ഹൈക്കോടതി. വിചാരണക്കോടതി ഉത്തരവിനെതിരെ പ്രതികള് സമര്പ്പിച്ച അപ്പീല് ഹൈക്കോടതി തളളി. 12 പ്രതികളാണ് വിചാരണാക്കോടതി വിധിക്കെതിരെ ഹൈക്കോടതിയെ സമീപിച്ചത്. പതിനൊന്നുപേരുടെ ജാമ്യം റദ്ദാക്കിയ നടപടി ശരിവെച്ച കോടതി, പതിനൊന്നാം പ്രതി ഷംസുദ്ദീന് ജാമ്യം അനുവദിച്ചു. ജസ്റ്റിസ് കൗസര് എടപ്പഗത്താണ് വിധി പറഞ്ഞത്.
പ്രതികള് സാക്ഷികളെ സ്വാധീനിക്കാന് ശ്രമിച്ചു എന്ന് കണ്ടെത്തിയതിനെത്തുടര്ന്നാണ് മണ്ണാര്ക്കാട് എസ് സി- എസ് ടി കോടതി ജാമ്യം റദ്ദാക്കിയത്. മരയ്ക്കാര്, ഷംസുദ്ദീന്, അനീഷ്, രാധാകൃഷ്ണന്, അബൂബക്കര്, സിദ്ദിഖ്, നജീബ്, ജൈജു മോന്, അബ്ദുള് കരീം, സജീവ്, ബിജു, മുനീര് എന്നിവരുടെ ജാമ്യമാണ് റദ്ദാക്കിയത്. അന്ന് കോടതിയില് ഹാജരായ അനീഷിനെയും ബിജുവിനെയും സിദ്ദിഖിനെയും പൊലീസ് ജയിലിലടച്ചിരുന്നു. ജാമ്യം റദ്ദാക്കിയ മറ്റ് ഒമ്പത് പ്രതികളും ഒളിവില് പോവുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പ്രതികള് നേരിട്ടും മറ്റുളളവരെ ഉപയോഗിച്ചും സാക്ഷികളെ സ്വാധീനിക്കാന് ശ്രമിക്കുന്നതിന്റെ ഫോണ് റെക്കോര്ഡുകളടക്കം പ്രൊസിക്ക്യൂഷന് കോടതിയില് ഹാജരാക്കിയിരുന്നു. കേസില്നിന്ന് പിന്മാറാനാവശ്യപ്പെട്ട് മധുവിന്റെ അമ്മ മല്ലിയെയും സഹോദരി സരസുവിനെയും പ്രതികളിലൊരാളുടെ ബന്ധുക്കള് വീട്ടില് കയറി ഭീഷണിപ്പെടുത്തിയിരുന്നു. ഇക്കാര്യങ്ങളെല്ലാം പ്രൊസിക്ക്യൂഷന് കോടതിയില് പറഞ്ഞിരുന്നു. 2018 മെയ് മുപ്പതിനായിരുന്നു പ്രതികള്ക്ക് ഹൈക്കോടതി ജാമ്യം അനുവദിച്ചത്.