ചെന്നൈ: ഹിന്ദി അടിച്ചേല്‍പ്പിക്കാനുളള കേന്ദ്രസര്‍ക്കാരിന്റെ തീരുമാനത്തെ എന്തുവിലകൊടുത്തും എതിര്‍ക്കുമെന്ന് ഡിഎംകെ യൂത്ത് വിങ് സെക്രട്ടറിയും ചെപ്പോക്ക് എം എല്‍ എയുമായ ഉദയനിധി സ്റ്റാലിന്‍. ഹിന്ദി നിര്‍ബന്ധമാക്കാനുളള തീരുമാനത്തില്‍നിന്ന് സര്‍ക്കാര്‍ പിന്മാറിയില്ലെങ്കില്‍ 'ഹിന്ദി തെരിയാത് പോടാ' പ്രചാരണവുമായി ഡല്‍ഹിയിലെത്തുമെന്നും ഹിന്ദി വിരുദ്ധ നിലപാടില്‍ ഡിഎംകെ ഒരിക്കലും വിട്ടുവീഴ്ച്ച ചെയ്യില്ലെന്നും ഉദയനിധി സ്റ്റാലിന്‍ പറഞ്ഞു.
'ഇതര ഭാഷകള്‍ സംസാരിക്കുന്ന സംസ്ഥാനങ്ങളില്‍ ഹിന്ദി അടിച്ചേല്‍പ്പിക്കാന്‍ കേന്ദ്രസര്‍ക്കാര്‍ ശ്രമിക്കുമ്പോഴെല്ലാം ഡിഎംകെ പ്രതിഷേധിക്കും. 2019-ലെ തെരഞ്ഞെടുപ്പിലെന്നപോലെ 2024-ലെ തെരഞ്ഞെടുപ്പിലും തമിഴ്‌നാട്ടിലെ ജനങ്ങള്‍ ബിജെപിയെ പരാജയപ്പെടുത്തും. ഹിന്ദി അടിച്ചേല്‍പ്പിക്കാനുളള തീരുമാനം കേന്ദ്രം മാറ്റിയില്ലെങ്കില്‍ ഡല്‍ഹില്‍ പ്രതിഷേധം സംഘടിപ്പിക്കാന്‍ പാര്‍ട്ടി മടിക്കില്ല. തമിഴ്‌നാട് ഇപ്പോള്‍ ഭരിക്കുന്നത് എടപ്പാടി പളനിസ്വാമിയോ ഒ പനീര്‍സെല്‍വമോ ആണെന്നാണ് മോദിയും അമിത് ഷായും കരുതുന്നതെങ്കില്‍ തെറ്റി, ഇപ്പോള്‍ തമിഴ്‌നാട് മുഖ്യമന്ത്രി മുത്തുവേല്‍ കരുണാനിധി സ്റ്റാലിനാണ്'-ഉദനയനിധി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'ഹിന്ദി അടിച്ചേല്‍പ്പിക്കുന്നതിനെ ഞങ്ങള്‍ എന്നും എതിര്‍ക്കും. പെരിയാര്‍, അണ്ണാദുരൈ, കരുണാനിധി എന്നിവരുടെ പാതയാണ് പിന്തുടരുന്നത്. ഹിന്ദിയുടെയും സംസ്ഥാനത്തിന്റെ അവകാശങ്ങളുടെയും വിഷയത്തില്‍ ഞങ്ങളുടെ നിലപാടില്‍നിന്ന് ഒരിക്കലും പിന്‍മാറില്ല. ഹിന്ദി അടിച്ചേല്‍പ്പിക്കാന്‍ ശ്രമിക്കുന്നവരോട് ഒന്നേ പറയാനുളളു.'ഹിന്ദി തെരിയാത് പോടാ'-ഉദയനിധി സ്റ്റാലിന്‍ കൂട്ടിച്ചേര്‍ത്തു.
