കൊച്ചി: ബലാത്സംഗക്കേസില്‍ പ്രതിയായതിനെത്തുടര്‍ന്ന് ഒളിവില്‍ പോയ എല്‍ദോസ് കുന്നപ്പിളളി എം എല്‍ എയെ പാര്‍ട്ടിയില്‍നിന്ന് സസ്‌പെന്‍ഡ് ചെയ്‌തേക്കും. സംഭവത്തില്‍ വിശദീകരണം നല്‍കാന്‍ കെ പി സി സി അനുവദിച്ച സമയം ഇന്ന് അവസാനിക്കുകയാണ്. നിശ്ചിത സമയ പരിധിക്കുളളില്‍ വിശദീകരണം നല്‍കിയില്ലെങ്കില്‍ കടുത്ത അച്ചടക്ക നടപടികളിലേക്ക് കടക്കുമെന്ന് കെ പി സി സി പ്രസിഡന്റ് കെ സുധാകരന്‍ നേരത്തെ മുന്നറിയിപ്പ് നല്‍കിയിരുന്നു. കേസില്‍ പ്രതിയായതിനുപിന്നാലെ എല്‍ദോസ് ഒളിവില്‍ പോയത് പാര്‍ട്ടിക്ക് കടുത്ത ക്ഷീണമുണ്ടാക്കിയെന്നാണ് നേതൃത്വത്തിന്റെ വിലയിരുത്തല്‍. അതിനാല്‍ വിശദീകരണം നല്‍കിയാലും പാര്‍ട്ടിയില്‍നിന്ന് സസ്‌പെന്‍ഡ് ചെയ്യാനാണ് സാധ്യത.
അതേസമയം, എല്‍ദോസ് കുന്നപ്പിളളിയുടെ ജാമ്യാപേക്ഷയില്‍ തിരുവനന്തപുരം സെഷന്‍സ് കോടതി ഇന്ന് വിധി പറഞ്ഞേക്കും. ബലാത്സംഗപരാതി കെട്ടിച്ചമച്ചതാണെന്നും ബ്ലാക്ക് മെയിലിങ്ങിന്റെ ഭാഗമായാണ് യുവതി ആരോപണമുന്നയിക്കുന്നതെന്നും എല്‍ദോസിന്റെ അഭിഭാഷകന്‍ കോടതിയില്‍ വാദിച്ചിരുന്നു. ജാമ്യാപേക്ഷയില്‍ ഉത്തരവിടുന്നതിനുമുന്‍പ് തന്റെ ഭാഗം കൂടി കേള്‍ക്കണമെന്ന് പരാതിക്കാരിയായ യുവതിയും കോടതിയില്‍ പറഞ്ഞിട്ടുണ്ട്. ജാമ്യാപേക്ഷയില്‍ വിധി വന്നതിനുശേഷം അറസ്റ്റുള്‍പ്പെടെയുളള നടപടികളിലേക്ക് കടക്കാനാണ് അന്വേഷണ സംഘം ആലോചിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
എല്‍ദോസിനെതിരെ കഴിഞ്ഞ ദിവസം രണ്ട് പൊലീസുകാര്‍ കൂടി മൊഴി നല്‍കിയിരുന്നു. കോവളം സ്‌റ്റേഷനിലെ പൊലീസുകാരാണ് ജില്ലാ ക്രൈംബ്രാഞ്ചിനുമുന്‍പാകെ മൊഴി നല്‍കിയത്. കോവളത്തെ ആത്മഹത്യാമുനമ്പില്‍ വെച്ച് എംഎല്‍എ മര്‍ദ്ദിച്ചെന്ന പരാതിയില്‍ ആ സമയത്ത് രണ്ട് പൊലീസുകാര്‍ സ്ഥലത്തെത്തിയതായി പറഞ്ഞിരുന്നു. മര്‍ദ്ദനത്തെത്തുടര്‍ന്ന് നിലവിളിച്ചപ്പോള്‍ നാട്ടുകാര്‍ വിവരമറിയിച്ചതിനെത്തുടര്‍ന്ന് പൊലീസെത്തിയെന്നാണ് യുവതി മൊഴിയില്‍ പറഞ്ഞത്. ഒപ്പമുളളത് ഭാര്യയാണെന്ന് എം എല്‍ എ പറഞ്ഞെന്നും തുടര്‍ന്ന് എം എല്‍ എയെയും യുവതിയെയും കാറില്‍ കയറ്റി അയച്ചെന്നുമാണ് പൊലീസുകാരുടെ മൊഴി.
