തിരുവനന്തപുരം: ചരിത്രം സൃഷ്ടിച്ച് കേരളാ നിയമസഭാ. ഇത്തവണ നിയമസഭാ സ്പീക്കര്‍ പാനലില്‍ മുഴുവന്‍പേരും വനിതകളാണ്. ഭരണപക്ഷത്തുനിന്നും യു പ്രതിഭ, സി കെ ആശ എന്നിവരും പ്രതിപക്ഷത്തുനിന്നും കെ കെ രമയുമാണ് സ്പീക്കര്‍ പാനലിലുളളത്. പാനലിലെ മുഴുവന്‍ അംഗങ്ങളും വനിതകളാവുന്നത് ഇതാദ്യമായാണ്. വനിതകള്‍ സ്പീക്കര്‍ പാനലില്‍ വരണമെന്ന ആശയം മുന്നോട്ടുവെച്ചത് സ്പീക്കര്‍ എ എന്‍ ഷംസീറാണ്. സ്പീക്കറും ഡെപ്യൂട്ടി സ്പീക്കറും ഇല്ലാത്തപ്പോള്‍ സഭ നിയന്ത്രിക്കേണ്ടത് ഈ പാനലിലുളള അംഗങ്ങളാണ്.
സാധാരണ മൂന്നുപേരടങ്ങുന്ന സ്പീക്കര്‍ പാനലില്‍ പരമാവധി ഒരു വനിതാ അംഗം മാത്രമാണുണ്ടാവുക. ഒരു സമ്മേളനത്തില്‍തന്നെ പാനലിലെ മുഴുവന്‍ അംഗങ്ങളും വനിതകളാവുന്നത് കേരളാ നിയമസഭയുടെ ചരിത്രത്തിലാദ്യമായാണ്. ഒന്നാം കേരളാ നിയമസഭ മുതല്‍ സഭയുടെ നടപ്പുസമ്മേളനം വരെ ആകെ 515 അംഗങ്ങള്‍ സ്പീക്കര്‍ പാനലില്‍ വന്നിട്ടുണ്ട്. അവരില്‍ 32 പേര്‍ മാത്രമാണ് വനിതകള്‍. ഈ പശ്ചാത്തലത്തിലാണ് എ എന്‍ ഷംസീറിന്റെ തീരുമാനം പ്രശംസനീയമാകുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ആര്‍എംപി നേതാവ് കെ കെ രമ പാനലില്‍ ഉള്‍പ്പെട്ടതും ശ്രദ്ധേയമായി. പാനലിനെ തെരഞ്ഞെടുക്കുമ്പോള്‍ പ്രതിപക്ഷത്തിന് ഒരു അംഗത്തെ നോമിനേറ്റ് ചെയ്യാം. കോണ്‍ഗ്രസ് എംഎല്‍എ ഉമാ തോമസ് ഉണ്ടായിട്ടും യുഡിഎഫ് കെ കെ രമയെ നാമനിര്‍ദേശം ചെയ്തു എന്നതാണ് ശ്രദ്ധേയം.
