മുംബൈ: സമീപകാല സൗത്ത് ഇന്ത്യന്‍ സിനിമകളെക്കുറിച്ച് സംവിധായകന്‍ അനുരാഗ് കശ്യപ് നടത്തിയ പരാമര്‍ശത്തില്‍ കശ്മീര്‍ ഫയല്‍സ് സംവിധായകന്‍ വിവേക് അഗ്നിഹോത്രി വിയോജിപ്പ് രേഖപ്പെടുത്തിയത് ട്വിറ്ററില്‍ ഇരുവരും തമ്മിലുളള വാക്‌പോരിനാണ് തുടക്കം കുറിച്ചത്. കാന്താര, പുഷ്പ തുടങ്ങിയ സിനിമകള്‍ സിനിമാ മേഖലയെ നശിപ്പിക്കും എന്നായിരുന്നു അനുരാഗ് കശ്യപ് പറഞ്ഞത്. ആ അഭിമുഖത്തിന്റെ സ്‌ക്രീന്‍ഷോട്ട് പങ്കുവെച്ച്, ബോളിവുഡിലെ ഒരേയൊരു മഹാനായ സംവിധായകന്റെ കാഴ്ച്ചപ്പാടുകളോട് ഞാന്‍ പൂര്‍ണ്ണമായും വിയോജിക്കുന്നു എന്നാണ് വിവേക് അഗ്നിഹോത്രി ട്വിറ്ററില്‍ കുറിച്ചത്.
വിവേകിന്റെ ട്വീറ്റിന് മറുപടിയായി 'സര്‍, ഇത് നിങ്ങളുടെ തെറ്റല്ല. ഞാന്‍ അഭിമുഖത്തില്‍ പറഞ്ഞ വിഷയത്തെക്കുറിച്ചുളള നിങ്ങളുടെ ട്വീറ്റ് പോലെയാണ് നിങ്ങളുടെ സിനികളെക്കുറിച്ചുളള ഗവേഷണവും. നിങ്ങളുടെയും നിങ്ങളുടെ മാധ്യമങ്ങളുടെയും അവസ്ഥ ഒന്നുതന്നെയാണ്. അടുത്ത തവണ സിനിമ ചെയ്യുമ്പോള്‍ കുറച്ച് ഗവേഷണം ചെയ്യുന്നത് നല്ലതാണ്'- എന്നാണ് അനുരാഗ് കശ്യപ് പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇതിന് കശ്മീര്‍ ഫയല്‍സിനുവേണ്ടി താന്‍ നാലുവര്‍ഷമാണ് റിസര്‍ച്ച് ചെയ്തതെന്നും തന്റെ കണ്ടെത്തലുകള്‍ കളളമായിരുന്നുവെന്ന് താങ്കള്‍ തെളിയിക്കൂ എന്നുമായിരുന്നു വിവേക് അഗ്നിഹോത്രിയുടെ വെല്ലുവിളി. ഹിന്ദുക്കളാരും കശ്മീരില്‍ കൊല്ലപ്പെട്ടിട്ടില്ലെന്ന് തെളിയിക്കുകയാണെങ്കില്‍ താന്‍ തെറ്റ് ആവര്‍ത്തിക്കാതിരിക്കാമെന്നും വിവേക് അഗ്നിഹോത്രി ട്വിറ്ററില്‍ കുറിച്ചു.
വിവേക് അഗ്നിഹോത്രിയുടെ 'ദി വാക്‌സിന്‍ വാര്‍' അടുത്തിടെയാണ് ചിത്രീകരണം ആരംഭിച്ചത്. സ്വാതന്ത്ര്യദിനത്തോടനുബന്ധിച്ചാണ് ചിത്രം തിയറ്ററുകളിലെത്തുക. ദൊബാര എന്ന ചിത്രമാണ് അനുരാഗ് കശ്യപിന്റെതായി അവസാനം റിലീസ് ചെയ്തത്.
