മലപ്പുറം: യൂത്ത് ലീഗ് സംസ്ഥാന ജനറല് സെക്രട്ടറി പി കെ ഫിറോസിന്റെ അറസ്റ്റിനെതിരെ ഇന്ന് യൂത്ത് ലീഗിന്റെ സംസ്ഥാന വ്യാപക പ്രതിഷേധം. എസ് പി ഓഫീസുകളിലേക്ക് മാര്ച്ചും ധര്ണ്ണയും സംഘടിപ്പിക്കും. രാവിലെ കോഴിക്കോട് കമ്മീഷണര് ഓഫീസിലേക്ക് നടത്തുന്ന മാര്ച്ച് കെ എം ഷാജിയാണ് ഉദ്ഘാടനം ചെയ്യുക. സംസ്ഥാന വ്യാപകമായി നടക്കുന്ന പ്രതിഷേധ ധര്ണ്ണകളില് മുതിര്ന്ന നേതാക്കളടക്കം പങ്കെടുക്കും. സെക്രട്ടറിയേറ്റിലേക്ക് നടന്ന സേവ് കേരളാ മാര്ച്ചിലുണ്ടായ സംഘര്ഷത്തിന്റെ പേരിലാണ് പി കെ ഫിറോസിനെ പൊലീസ് അറസ്റ്റ് ചെയ്തത്.
പൊലീസിനെ ആക്രമിക്കല്, പൊതുമുതല് നശിപ്പിക്കല് തുടങ്ങി ജാമ്യമില്ലാ വകുപ്പുകള് ചുമത്തിയാണ് പി കെ ഫിറോസിനെ അറസ്റ്റ് ചെയ്തത്. കോടതി അദ്ദേഹത്തെ 14 ദിവസത്തേക്ക് റിമാന്ഡ് ചെയ്തു. ഫിറോസിനൊപ്പം അറസ്റ്റിലായ 28 യൂത്ത് ലീഗ് പ്രവര്ത്തകരും റിമാന്ഡിലാണ്. പി കെ ഫിറോസിന്റെ അറസ്റ്റിനുപിന്നില് രാഷ്ട്രീയ ലക്ഷ്യമാണെന്നും ജാമ്യം നല്കാതിരിക്കാനാണ് സര്ക്കാരിന്റെ ശ്രമമെന്നുമാണ് പി കെ കുഞ്ഞാലിക്കുട്ടി പറഞ്ഞത്. ഫിറോസിന്റെ അറസ്റ്റ് ഭരണകൂട ഭീകരതയാണെന്ന് കോണ്ഗ്രസ് നേതാവ് രമേശ് ചെന്നിത്തലയും പ്രതികരിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, എല്ഡിഎഫ് സര്ക്കാരിനെതിരായ സമരം ശക്തമാക്കാനാണ് മുസ്ലീം ലീഗ് ആലോചിക്കുന്നത്. കഴിഞ്ഞ കാലങ്ങളില് എല്ഡിഎഫ് നടത്തിയ സമരങ്ങളിലുണ്ടായ നാശനഷ്ടങ്ങളും അക്രമങ്ങളും ചൂണ്ടിക്കാണിച്ച് സമൂഹമാധ്യമങ്ങളില് ക്യാംപെയ്നുകള് നടത്താനും പദ്ധതിയുണ്ട്.