തിരുവനന്തപുരം: സിപിഎമ്മിനെതിരെ രൂക്ഷവിമര്ശനവുമായി പ്രതിപക്ഷ നേതാവ് വി ഡി സതീശന്. ആകാശ് തില്ലങ്കേരിയുടെയും സ്വപ്നാ സുരേഷിന്റെയും വെളിപ്പെടുത്തലുകള് സിപിഎമ്മിനെ ബാധിച്ചിരിക്കുന്ന ജീര്ണ്ണതയുടെ തെളിവാണെന്ന് അദ്ദേഹം പറഞ്ഞു. ഗുണ്ടാ മാഫിയകളുമായും ക്രിമിനല് സംഘങ്ങളുമായുളള സിപിഎമ്മിന്റെ ബന്ധം ഭരണത്തണലില് തഴച്ചുവളരുകയാണെന്നും സിപിഎം ഒരു രാഷ്ട്രീയ പ്രസ്ഥാനം എന്നതിനപ്പുറം ഒരു ഭീകര സംഘടനയായി അധഃപതിച്ചെന്നും വി ഡി സതീശന് പറഞ്ഞു.
'ആകാശ് തില്ലങ്കേരിയെപ്പോലുളള ക്രിമിനലുകളെ ഉപയോഗിച്ച് രാഷ്ട്രീയ എതിരാളികളെ കൊന്നുതളളുകയും സ്വപ്നാ സുരേഷിനെപ്പോലുളള ആളുകളെ ഉപയോഗിച്ച് അനധികൃത സ്വത്ത് സമ്പാദനം നടത്തുകയും ചെയ്യുന്ന പാര്ട്ടിയാണ് സിപിഎം. ഷുഹൈബ് വധക്കേസില് സര്ക്കാര് സി ബി ഐ അന്വേഷണത്തെ എതിര്ത്തത് എന്തിനാണെന്ന് മനസിലായി. കൃത്യമായ അന്വേഷണം നടത്തിയാല് സിപിഎം നേതാക്കള് കുടുങ്ങുമെന്നുറപ്പാണ്. എല്ലാം ചെയ്യിച്ചത് പാര്ട്ടിയാണെന്ന് ആകാശ് തില്ലങ്കേരി പറഞ്ഞിട്ടും പൊലീസ് ഒരു ചെറുവിരല് അനക്കിയിട്ടില്ല'- വി ഡി സതീശന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ലൈഫ് മിഷന് കോഴ ഇടപാടില് മുഖ്യമന്ത്രി പിണറായി വിജയനും പ്രതിക്കൂട്ടിലാണെന്നും തുടക്കംമുതല് കേസ് അട്ടിമറിക്കാനായിരുന്നു സര്ക്കാര് ശ്രമിച്ചതെന്നും പ്രതിപക്ഷ നേതാവ് പറഞ്ഞു. മുഖ്യമന്ത്രിക്കും സര്ക്കാരിനും മറച്ചുവയ്ക്കാന് ഒരുപാടുണ്ടെന്നും ജനങ്ങളും പ്രതിപക്ഷവും ചോദിക്കുന്ന ചോദ്യങ്ങള്ക്ക് മുഖ്യമന്ത്രി മറുപടി പറഞ്ഞേ മതിയാവൂ എന്നും അദ്ദേഹം കൂട്ടിച്ചേര്ത്തു.