മുംബൈ: മതവികാരം വ്രണപ്പെടുത്തി എന്ന് ആരോപിച്ച് ബോളിവുഡ് നടി തപ്സി പന്നുവിനെതിരെ പരാതി. ബി.ജെ.പി എം.എൽ.എ മാലിനിയുടെ മകൻ ഏകലവ്യ ഗൗറാണ് നടിക്കെതിരെ പരാതി നല്‍കിയത്. മാർച്ച് 12ന് മുംബൈയിൽ നടന്ന ലാക്‌മെ ഫാഷൻ വീക്കില്‍ റാംപ് വാക്കിൽ തപ്സി അണിഞ്ഞിരുന്ന ഡ്രസും ആഭരണവുമാണ് ഇപ്പോള്‍ വിവാദമായിരിക്കുന്നത്. ഗ്ലാമർ വസ്ത്രത്തോടൊപ്പം ലക്ഷ്മി ദേവിയുടെ ഡിസൈനിലുള്ള മാലയാണ് തപ്സി പന്നു ധരിച്ചിരിക്കുന്നത്. ഇത് ഹിന്ദു ദേവതകളെ അപമാനിക്കുന്നതിന് തുല്യമാണെന്നും നടി അശ്ലീലം പ്രചരിപ്പിക്കുകയും ചെയ്തുവെന്നുമാണ് പരാതിയില്‍ ആരോപിക്കുന്നത്.
ലാക്‌മെ ഫാഷൻ വീക്കില്‍ നിന്നുള്ള ചിത്രങ്ങള്‍ താരം സോഷ്യല്‍ മീഡിയയിലും പങ്കുവച്ചിട്ടുണ്ട്. എന്നാല്‍ പരാതിയുമായി ബന്ധപ്പെട്ട് തപ്സി പന്നു ഇതുവരെ പ്രതികരിച്ചിട്ടില്ല. നേരത്തെ സ്റ്റാന്‍ഡപ്പ് കൊമേഡിയന്‍ മുനവര്‍ ഫാറൂഖിക്കെതിരെയും ഏകലവ്യ പരാതി നല്‍കിയിരുന്നു. ഹാസ്യ പരിപാടിയില്‍ ഹിന്ദു ദൈവങ്ങളെ അപകീര്‍ത്തിപ്പെടുത്തുന്ന പരാമര്‍ശം നടത്തിയെന്നും മതവികാരം വ്രണപ്പെടുത്തിയെന്നും ചൂണ്ടിക്കാട്ടിയാണ് പരാതി നല്‍കിയത്. സംഭവത്തില്‍ കേസ് എടുത്ത പോലീസ് ഫാറൂഖിയെ 2021 ജനുവരി അറസ്റ്റ് ചെയ്യുകയും പിന്നീട് ജാമ്യത്തില്‍ വിട്ടയക്കുകയുമായിരുന്നു.
