കൊച്ചി: നടന്മാരായ ശ്രീനാഥ് ഭാസിക്കും ഷെയ്ന് നിഗത്തിനും സിനിമാ സംഘടനകളുടെ വിലക്ക്. ഇരുവര്‍ക്കുമെതിരെ നിരവധി പരാതികളുണ്ടെന്നും നിര്‍മ്മാതാക്കള്‍ക്ക് നിരന്തരമായി ബുദ്ധിമുട്ടുകള്‍ ഉണ്ടാക്കുന്നതുകൊണ്ടാണ് നടപടിയെടുക്കുന്നതെന്നും സംഘടനകള്‍ അറിയിച്ചു. പ്രൊഡ്യൂസേഴ്‌സ് അസോസിയേഷന്‍, താരസംഘടനയായ അമ്മ, സാങ്കേതിക വിദഗ്ദരുടെ സംഘടനയായ ഫെഫ്ക എന്നിവരുടെ സംയുക്ത യോഗത്തിലാണ് ഇരു നടന്മാരെയും വിലക്കാനുളള തീരുമാനമെടുത്തത്.
'ഷെയ്ന് നിഗം സിനിമാ ഷൂട്ടിംഗ് പകുതിയെത്തി നില്‍ക്കുമ്പോള്‍ തനിക്ക് എഡിറ്റ് ചെയ്ത രൂപം കാണണമെന്ന് ആവശ്യപ്പെടുകയും സിനിമയില്‍ തനിക്ക് കൂടുതല്‍ പ്രാധാന്യം വേണമെന്ന് നിര്‍ബന്ധം പിടിക്കുകയും ചെയ്‌തെന്ന് തെളിവുസഹിതം പരാതി ലഭിച്ചിട്ടുണ്ട്. ശ്രീനാഥ് ഭാസി ഒരേസമയം നിരവധി സിനിമകള്‍ക്ക് ഡേറ്റ് കൊടുക്കുന്നു. സമയത്ത് സെറ്റിലെത്തില്ല. ഫോണ്‍ വിളിച്ചാല്‍ എടുക്കില്ല. ശ്രീനാഥ് ഏതെല്ലാം സിനിമകള്‍ക്ക് ഡേറ്റ് കൊടുത്തിട്ടുണ്ടെന്ന് അദ്ദേഹത്തിനുതന്നെ അറിയില്ല'- സംഘടനാ ഭാരവാഹികള്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
എഎംഎംഎയില്‍ അംഗമല്ലാത്തവരെ വച്ച് സിനിമ ചെയ്യുമ്പോഴുണ്ടാകുന്ന പ്രശ്‌നങ്ങള്‍ക്ക് അതിന്റെ നിര്‍മ്മാതാവ് മാത്രമായിരിക്കും ഉത്തരവാദിയെന്ന് ഫെഫ്ക ജനറല്‍ സെക്രട്ടറി ബി ഉണ്ണിക്കൃഷ്ണന്‍ പറഞ്ഞു. ലഹരിമരുന്ന് ഉപയോഗിക്കുന്ന നിരവധി പേര്‍ സിനിമാ രംഗത്തുണ്ടെന്നും ഇവരുടെ പേരുകള്‍ സര്‍ക്കാരിന് കൊടുക്കാന്‍ തീരുമാനിച്ചിട്ടുണ്ടെന്നും നിര്‍മ്മാതാവ് രഞ്ജിത്ത് വ്യക്തമാക്കി.
