തിരുവനന്തപുരം: പ്രധാനമന്ത്രി നരേന്ദ്രമോദിക്ക് അദാനി എങ്ങനെയാണോ അതുപോലെയാണ് മുഖ്യമന്ത്രി പിണറായി വിജയന് ഊരാളുങ്കല്‍ ലേബര്‍ സൊസൈറ്റിയെന്ന് കെപിസിസി അധ്യക്ഷന്‍ കെ സുധാകരന്‍. എ ഐ ക്യാമറ വിവാദത്തില്‍ നടന്നത് വന്‍കൊളളയാണെന്നും നട്ടെല്ലുണ്ടെങ്കില്‍ പിണറായി വിജയന് സ്വതന്ത്ര്യ അന്വേഷണത്തിന് തയ്യാറാകണമെന്നും കെ സുധാകരന്‍ പറഞ്ഞു. അഴിമതി സത്യസന്ധമായി അന്വേഷിച്ച് റിപ്പോര്‍ട്ട് ജനങ്ങളുടെ മുന്നില്‍വയ്ക്കുക എന്നതാണ് ഇടതുപക്ഷം ചെയ്യേണ്ടതെന്നും അദ്ദേഹം പറഞ്ഞു.
'എല്ലാം സ്വന്തം കുടുംബത്തിലേക്ക് കൊണ്ടുവരികയാണ് പിണറായി വിജയന്. എ ഐ ക്യാമറയുമായി ബന്ധപ്പെട്ട കമ്പനിയില്‍ മുഖ്യമന്ത്രിയുടെ മകന്റെ ഭാര്യാപിതാവിന് പങ്കാളിത്തമുണ്ട് എന്നതിന്റെ രേഖയുണ്ട്. അരിവാരാന്‍ അരിക്കൊമ്പന്‍, ചക്കവാരാന്‍ ചക്കക്കൊമ്പന്‍, കേരളം വാരാന്‍ ഇരട്ടച്ചങ്കന്‍ എന്നതാണ് യാഥാര്‍ത്ഥ്യം. മകന്റെയും മകളുടെയും കുടുംബത്തിലൂടെ പടര്‍ന്നുപന്തലിക്കാനാണ് അദ്ദേഹത്തിന്റെ ശ്രമം'- കെ സുധാകരന്‍ പറഞ്ഞു. സംസ്ഥാന മന്ത്രിസഭയില്‍ ഒരാള്‍ക്കുപോലും ആ കമ്പനിയെക്കുറിച്ച് അറിവില്ലെന്നും അന്വേഷണം ആവശ്യപ്പെട്ട് യുഡിഎഫ് കോടതിയെ സമീപിക്കുമെന്നും അദ്ദേഹം കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
എ ഐ ക്യാമറ കരാര്‍ ആദ്യാവസാനം തട്ടിപ്പാണെന്നും ഗൂഢാലോചനയോടെയാണ് കരാര്‍ തുടങ്ങിയതെന്നും പ്രതിപക്ഷ നേതാവ് വി ഡി സതീശന്‍ ആരോപിച്ചു. ആരോപണം മുഖ്യമന്ത്രിയുടെ വീട്ടിനകത്തേക്കും മുറിയ്ക്കകത്തേക്കുംവരെ എത്തിയെന്നും മറുപടി നല്‍കാന്‍ മുഖ്യമന്ത്രിക്ക് ഒരു അവസരംകൂടി നല്‍കുകയാണെന്നും പ്രതിപക്ഷ നേതാവ് കൂട്ടിച്ചേര്‍ത്തു.
