മലപ്പുറം: പൊതുചടങ്ങുകളില്‍നിന്ന് ജനങ്ങള്‍ക്ക് ബുദ്ധിമുട്ടുണ്ടാകുന്ന തരത്തിലുളള ഈശ്വരപ്രാര്‍ത്ഥനകള്‍ ഒഴിവാക്കണമെന്ന് പി വി അന്‍വര്‍ എംഎല്‍എ. ദൈവവിശ്വാസം എല്ലാവരുടെയും മനസിലാണുളളതെന്നും വേദിയില്‍ വിശ്വാസികളല്ലാത്തവരും ഉണ്ടാകുമെന്നും പി വി അന്‍വര്‍ പറഞ്ഞു. ഇക്കാര്യത്തില്‍ സര്‍ക്കാര്‍ നയപരമായ തീരുമാനമെടുക്കണമെന്നും അടുത്ത നിയമസഭാ സമ്മേളനത്തില്‍ താന്‍ ഈ വിഷയം ഉന്നയിക്കുമെന്നും പി വി അന്‍വര്‍ പറഞ്ഞു. മഞ്ചേരി ടൗണ്‍ഹാളില്‍ നടന്ന ജില്ലാതല പട്ടയമേളയില്‍ സംസാരിക്കുകയായിരുന്നു അദ്ദേഹം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പട്ടയമേളയുടെ ഉദ്ഘാടനച്ചടങ്ങ് പ്രാര്‍ത്ഥനയോടെയാണ് ആരംഭിച്ചത്. ഈ സമയം കാലിന് സുഖമില്ലാത്ത ഒരാള്‍ മറ്റൊരാളുടെ സഹായത്തോടെയാണ് എഴുന്നേറ്റ് നിന്നത്. ഇത് ശ്രദ്ധയില്‍പ്പെട്ടപ്പോഴായിരുന്നു പി വി അന്‍വര്‍ ഈശ്വരപ്രാര്‍ത്ഥന ഒഴിവാക്കുന്ന കാര്യം പറഞ്ഞത്. 'ദൈവവിശ്വാസം ഓരോരുത്തരുടെയും മനസിലാണ്. ഈശ്വരവിശ്വാസികളല്ലാത്തവരും ചടങ്ങുകളിലുണ്ടാവും. പൊതുപരിപാടികളില്‍ പ്രാര്‍ത്ഥന പോലുളള അനാവശ്യ ചടങ്ങുകള്‍ ഒഴിവാക്കിക്കൂടെ? പ്രായാധിക്യം കാരണം എഴുന്നേറ്റുനില്‍ക്കാന്‍ കഴിയാത്തവരെയൊക്കെ മിനുറ്റുകളോളം എഴുന്നേല്‍പ്പിച്ചുനിര്‍ത്തുന്നത് ശരിരായ കാര്യമല്ല. പൊതുപരിപാടികളില്‍നിന്നും പ്രാര്‍ത്ഥന ഒഴിവാക്കുന്ന വിഷയം നിയമസഭയില്‍ അവതരിപ്പിക്കും'- പി വി അന്‍വര്‍ പറഞ്ഞു.
മന്ത്രിമാരായ കെ രാജന്‍, വി അബ്ദുറഹിമാന്‍ എന്നിവര്‍ വേദിയിലിരിക്കെയായിരുന്നു പി വി അന്‍വര്‍ ഇക്കാര്യം പറഞ്ഞത്. ചടങ്ങില്‍ റവന്യൂ വകുപ്പിലെ ജീവനക്കാരാണ് പ്രാര്‍ത്ഥനാഗീതം ആലപിച്ചത്.
