കോഴിക്കോട്: കോണ്‍ഗ്രസിലെ ഗ്രൂപ്പുകളുടെ ആധിക്യത്തെക്കുറിച്ചുളള മുതിര്‍ന്ന കോണ്‍ഗ്രസ് നേതാവ് വി എം സുധീരന്റെ പരാമര്‍ശത്തിന് മറുപടിയുമായി കെ മുരളീധരന്‍ എംപി. 2016-ലെ കാര്യം ഇപ്പോള്‍ പറഞ്ഞിട്ട് കാര്യമില്ലെന്നും പാര്‍ട്ടിയിലെ ഗ്രൂപ്പുകളുടെ കണക്കെടുക്കേണ്ട സമയമല്ല ഇതെന്നും മുരളീധരന്‍ പറഞ്ഞു. 2024-ലെ തെരഞ്ഞെടുപ്പിനായി കോണ്‍ഗ്രസ് ഒറ്റക്കെട്ടായി മുന്നോട്ടുപോകണമെന്നും വിഎം സുധീരനും പാര്‍ട്ടിക്കൊപ്പം പ്രവര്‍ത്തിക്കണമെന്നും മുരളീധരന്‍ പറഞ്ഞു. നേതാക്കള്‍ സുധീരനെ കണ്ട് സംസാരിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
കഴിഞ്ഞ ദിവസം തൃശൂര്‍ ഡിസിസി സംഘടിപ്പിച്ച തന്റെ പിറന്നാള്‍ ആഘോഷവേദിയിലായിരുന്നു സുധീരന് കോണ്‍ഗ്രസ് നേതൃത്വത്തെ വിമര്‍ശിച്ചത്. ഗ്രൂപ്പ് വീതംവയ്പ്പില്‍ മനംമടുത്താണ് രാജിവെച്ചതെന്നും അന്ന് രണ്ട് ഗ്രൂപ്പായിരുന്നത് ഇന്ന് അഞ്ച് ഗ്രൂപ്പായി മാറിയെന്നും വി എം സുധീരന് പറഞ്ഞു. കെപിസിസി അധ്യക്ഷന്‍ കെ സുധാകരനും പ്രതിപക്ഷ നേതാവ് വിഡി സതീശനും രമേശ് ചെന്നിത്തലയുമുള്‍പ്പെടെ വേദിയിലിരിക്കെയായിരുന്നു സുധീരന്റെ പരാമര്‍ശം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
യുഡിഎഫ് കണ്‍വീനര്‍ എംഎം ഹസനും സുധീരന്റെ പരാമര്‍ശത്തിനെതിരെ രംഗത്തെത്തിയിരുന്നു. 2016-ല്‍ വിഎം സുധീരന് രാജിവെച്ചത് ഗ്രൂപ്പിന് അതീതമായി പാര്‍ട്ടിയെ പുനസംഘടിപ്പിക്കാനുളള ശ്രമത്തില്‍ പരാജയപ്പെട്ടെന്ന് സ്വയം ബോധ്യപ്പെട്ടതോടെയാണ്. എല്ലാ കാലത്തും ഗ്രൂപ്പും തെരഞ്ഞെടുപ്പുകാലത്തെ തര്‍ക്കവുമൊക്കെ ഉണ്ടായിട്ടുണ്ട്. ഗ്രൂപ്പുകള്‍ക്ക് അതീതമായി പാര്‍ട്ടിയെ ഒറ്റക്കെട്ടായി മുന്നോട്ടുകൊണ്ടുപോകാനാണ് ഇപ്പോഴത്തെ നേതൃത്വം ശ്രമിക്കേണ്ടത്'-എന്നാണ് എംഎം ഹസന്‍ പറഞ്ഞത്.
