ഡല്‍ഹി: അമൂല്‍ ബ്രാന്‍ഡ്‌ ഐക്കണായ അമൂല്‍ ഗേളിന്‍റെ സൃഷ്ടാവ് സിൽവസ്റ്റർ ഡകുൻഹ അന്തരിച്ചു. 80 വയസായിരുന്നു. ചൊവ്വാഴ്ച രാത്രി മുംബൈയില്‍ വച്ചായിരുന്നു അന്ത്യം. 1966-ൽ ആണ് അമൂലിന് വേണ്ടി സില്‍വസ്റ്റര്‍ ഡകൂന പരസ്യ കാമ്പെയിന് തുടക്കം കുറിക്കുന്നത്. പരസ്യ ഏജൻസിയായ എഎസ്പിയുടെ മാനേജിങ് ഡയറക്ടറായിരുന്ന സിൽവസ്റ്റർ ഡകൂനയും കലാസംവിധായകൻ യൂസ്റ്റേസ് ഫെർണാണ്ടസും ചേർന്നാണ് അമൂൽ ഗേളിനെ രൂപകൽപന ചെയ്തത്. അമൂലിന്‍റെ എതിരാളി ബ്രാന്‍ഡായ പോള്‍സണിന്‍റെ ബട്ടര്‍-ഗേളിന് എതിരായാണ് അമൂല്‍ ഗേളിനെ സൃഷ്ടിച്ചത്. ഇതിന് ശേഷമാണ് അമുലിന്റെ പരസ്യ കാമ്പെയ്‌ൻ ആരംഭിച്ചത്.
2016 -ല്‍ അമൂല്‍ ഗേളിന്‍റെ അമ്പതാം പിറന്നാള്‍ വിപുലമായി ആഘോഷിച്ചിരുന്നു. ആറു പതിറ്റാണ്ടായി അമൂല്‍ പരസ്യവിഭാഗത്തിന്‍റെ ഭാഗമായിരുന്നു സിൽവസ്റ്റർ ഡകുൻഹ. പരസ്യ മേഖലയിലെ പ്രശസ്തന്‍ അന്തരിച്ച ജര്‍സണ്‍ ഡകൂന സഹോദരനാണ്. പരസ്യ വ്യവസായത്തിന് തീരാ നഷ്ടമാണ് സിൽവസ്റ്റർ ഡകുൻഹയുടെ വിയോഗമെന്ന് അമുൽ മാർക്കറ്ററും ഗുജറാത്ത് കോഓപ്പറേറ്റീവ് മിൽക്ക് മാർക്കറ്റിംഗ് ഫെഡറേഷൻ ലിമിറ്റഡിന്റെ മാനേജിംഗ് ഡയറക്ടറുമായ ജയൻ മേത്ത പറഞ്ഞു.
