ടോംടോം ട്രാഫിക് ഇൻഡക്‌സിന്റെ റിപ്പോര്‍ട്ട് പ്രകാരം കഴിഞ്ഞ വർഷം ഏറ്റവും കൂടുതൽ ഗതാഗത തിരക്കേറിയ ലോക നഗരമെന്ന റെക്കോര്‍ഡ് ബെംഗളൂരുവിന്. 57 രാജ്യങ്ങളിലുള്ള 415 നഗരങ്ങളെ പിന്നിലാക്കിയാണ് ബെംഗളൂരുവിന്‍റെ ‘കിരീട നേട്ടം’. നെതര്‍ലാന്‍ഡ്‌സ് ആസ്ഥാനമായുള്ള ലൊക്കേഷൻ ടെക്നോളജി സ്പെഷ്യലിസ്റ്റാണ് സര്‍വ്വേ നടത്തിയ ടോംടോം.
ഫിലിപ്പൈൻസിലെ മനിലക്കാണ് ഗതാഗതക്കുരുക്കില്‍ രണ്ടാംസ്ഥാനം. ബെംഗളൂരുവിനെ കൂടാതെ മുംബൈ നാലാം സ്ഥാനത്തും, പൂനെ അഞ്ചാം സ്ഥാനത്തും, ദില്ലി എട്ടാം സ്ഥാനത്തും എത്തി ആദ്യ പത്തില്‍ തന്നെ ഇന്ത്യയുടെ സാന്നിദ്ധ്യം ഊട്ടിയുറപ്പിച്ചിട്ടുണ്ട്. ഗതാഗതക്കുരുക്ക് കാരണം ബെംഗളൂരു നിവാസികള്‍ക്ക് എല്ലാ വര്‍ഷവും ശരാശരി 243 മണിക്കൂര്‍ (10 ദിവസവും 3 മണിക്കൂറും) നഷ്ടപ്പെടുന്നുവെന്നാണ് ടോംടോം പറയുന്നത്. വെള്ളിയാഴ്‍ചകളിൽ രാത്രി 8 മണിക്ക് ശേഷം ബെംഗളൂരുവിലൂടെ യാത്ര ചെയ്‌താല്‍ 5 മണിക്കൂറിലധികം സമയം ട്രാഫിക്കില്‍ കിടക്കാന്‍ ഭാഗ്യമുണ്ടാകും.
