പാലക്കാട്: നെന്മാറയില്‍ വിവാഹദിവസം വധൂവരന്മാരുടെ തല കൂട്ടിമുട്ടിച്ചതില്‍ വനിതാ കമ്മീഷന് സ്വമേധയാ കേസെടുത്തു. സംഭവത്തെക്കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ കൊല്ലങ്കോട് പൊലീസിന് വനിതാ കമ്മീഷന് നിര്‍ദേശം നല്‍കി. വിവാഹശേഷം വധൂവരന്മാരുടെ ഗൃഹപ്രവേശന സമയത്തായിരുന്നു ആചാരത്തിന്റെ പേരില്‍ ഇരുവരുടെയും തലകള്‍ അയല്‍വാസി കൂട്ടിമുട്ടിച്ചത്. പ്രതീക്ഷിക്കാതെയുണ്ടായ ഇടിയില്‍ വേദനകൊണ്ട് കരഞ്ഞാണ് വധു വരന്റെ വീട്ടിലേക്ക് കയറിയത്. ഇതിന്റെ വീഡിയോ സമൂഹമാധ്യമങ്ങളില്‍ വൈറലാവുകയും ഇതിനെതിരെ വ്യാപക വിമര്‍ശനങ്ങളുയരുകയും ചെയ്തിരുന്നു. ഈ പശ്ചാത്തലത്തിലാണ് വനിതാ കമ്മീഷന് സ്വമേധായ കേസെടുത്തത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ജൂണ്‍ ഇരുപത്തിയഞ്ചിനാണ് പല്ലശന സ്വദേശി സച്ചിനും കോഴിക്കോട് മുക്കം സ്വദേശി സജ്‌ലയും വിവാഹിതരായത്. വിവാഹശേഷം ഭര്‍തൃഗൃഹത്തിലേക്ക് പ്രവേശിക്കുന്ന വരന്റെയും വധുവിന്റെയും തലകള്‍ കൂട്ടിയിടിപ്പിക്കണമെന്നും അങ്ങനെ വധു കരഞ്ഞുകൊണ്ട് വരന്റെ വീട്ടിലേക്ക് പ്രവേശിക്കണം എന്നുമുളളത് പ്രദേശത്തെ ആചാരമാണ് എന്നാണ് സംഭവത്തെ അനുകൂലിക്കുന്നവര്‍ പറയുന്നത്. എന്നാല്‍ ഇത് പ്രാകൃതമായ ചടങ്ങാണെന്നും ഒരാളെ ആചാരത്തിന്റെ പേരില്‍ വേദനിപ്പിക്കുന്നത് ശരിയല്ലെന്നും ഇത്തരം ആചാരങ്ങള്‍ പ്രോത്സാഹിപ്പിക്കരുതെന്നും വിമര്‍ശിക്കുന്നവരുമുണ്ട്.
