തിരുവനന്തപുരം: സംസ്ഥാനത്തെ ആദ്യത്തെ നൈറ്റ് ലൈഫ് സെന്റര്‍ ഈ മാസം തുറക്കും. ഇനി രാത്രി എട്ടുമുതല്‍ പുലര്‍ച്ചെ അഞ്ചുമണിവരെ തിരുവനന്തപുരത്തെ മാനവീയം വീഥി ഉണര്‍ന്നിരിക്കും. കലാപരിപാടികളും ഭക്ഷണവുമൊക്കെയായി രാത്രിജീവിതം ആസ്വദിക്കാം. മാനവീയം വീഥിയുടെ നവീകരണത്തിന്റെ ഭാഗമായി പാതയോരത്ത് തയാറാക്കിയ കടകളുടെ നടത്തിപ്പ് കുടുംബശ്രീയെ ആണ് ഏല്‍പ്പിച്ചിരിക്കുന്നത്. മൂന്ന് മൊബൈല്‍ വെന്‍ഡിംഗ് ഭക്ഷണശാലകളും നൈറ്റ് ലൈഫ് സെന്ററിലുണ്ടാകും.
ഇവിടെ കലാപരിപാടികള്‍ അവതരിപ്പിക്കാന്‍ മുന്‍കൂട്ടി ബുക്ക് ചെയ്യണം. ജില്ലാ ടൂറിസം പ്രമോഷന്‍ കൗണ്‍സിലും കോര്‍പ്പറേഷനും സംയുക്തമായി കലാപരിപാടികള്‍ ബുക്ക് ചെയ്യുന്നതിനായി പോര്‍ട്ടല്‍ ക്രമീകരിക്കും. പോര്‍ട്ടലിലൂടെ കലാകാരന്മാര്‍ക്കും സംഘങ്ങള്‍ക്കും പരിപാടികള്‍ മുന്‍കൂട്ടി ബുക്ക് ചെയ്യാം. അപേക്ഷകള്‍ പരിശോധിച്ചശേഷമാകും അനുമതി നല്‍കുക. വാണിജ്യപരമായ പരിപാടികള്‍ക്ക് കോര്‍പ്പറേഷന്‍ ഒരു നിശ്ചിത തുക ഈടാക്കും.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അടുത്ത മാസം നടക്കുന്ന കേരളീയം പരിപാടിക്കു മുന്നോടിയായി നൈറ്റ് ലൈഫ് പൂര്‍ണമായും ആരംഭിക്കും. മാനവീയം വീഥിയിലെ വൈദ്യുതി, വെളളം, മാലിന്യ സംസ്‌കരണം എന്നിവയുടെ ചുമതല കോര്‍പ്പറേഷനാണ്. നൈറ്റ് ലൈഫ് സെന്ററില്‍ ഇരിപ്പിടങ്ങളോ ശൗചാലയമോ ഇല്ലെന്നതാണ് ഏറ്റവും വലിയ പോരായ്മയായി ചൂണ്ടിക്കാട്ടപ്പെടുന്നത്. മാലിന്യം തളളാനുളള ബിന്നുകളും ഇതുവരെ സ്ഥാപിച്ചിട്ടില്ല.
