കൊച്ചി: കളമശേരി സ്ഫോടനവുമായി ബന്ധപ്പെട്ട വിദ്വേഷ പരാമര്ശത്തില് കേന്ദ്രമന്ത്രി രാജീവ് ചന്ദ്രശേഖറിനെതിരെ കേസെടുത്തു. സമൂഹമാധ്യമങ്ങളിലൂടെ വിദ്വേഷ പ്രചാരണം നടത്തിയെന്നാണ് കേസ്. സൈബര് സെല് എസ് ഐയുടെ പരാതിയില് എറണാകുളം സെന്ട്രല് പൊലീസാണ് കേസെടുത്തത്. ഐപിസി 153 (സമൂഹത്തില് വിദ്വേഷം വളര്ത്തുന്നതിനുളള ഇടപെടല്), 153 എ(രണ്ട് വിഭാഗങ്ങള് തമ്മില് സ്പര്ധയുണ്ടാക്കുന്നതിനുളള വിദ്വേഷ പ്രചാരണം) എന്നീ വകുപ്പുകള് പ്രകാരമാണ് കേസെടുത്തത്. ഇതില് 153 എ ജാമ്യം കിട്ടാത്ത വകുപ്പാണ്.
കളമശേരി കണ്വെന്ഷന് സെന്ററില് നടന്ന സ്ഫോടനത്തിന്റെ പശ്ചാത്തലത്തില് രാജീവ് ചന്ദ്രശേഖര് നടത്തിയ പ്രതികരണങ്ങള്ക്കെതിരെ സമൂഹമാധ്യമങ്ങളിലുള്പ്പെടെ വലിയ പ്രതിഷേധമുയര്ന്നിരുന്നു. കേന്ദ്രമന്ത്രിയുടെ നിലപാടിനെ രൂക്ഷമായി വിമര്ശിച്ച് മുഖ്യമന്ത്രിയുള്പ്പെടെയുളള നേതാക്കളും രംഗത്തെത്തിയിരുന്നു. രാജീവ് ചന്ദ്രശേഖര് വിഷമല്ല, കൊടുംവിഷമാണ് എന്നാണ് മുഖ്യമന്ത്രി പിണറായി വിജയന് കഴിഞ്ഞ ദിവസം പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
'വിഷമല്ല. കൊടുംവിഷം. വെറും വിഷമല്ല. പക്ഷെ അദ്ദേഹം അത് അലങ്കാരമായാണ് കാണുന്നത്. അതാണ് അദ്ദേഹത്തിന്റെ പ്രത്യേകതയെന്നാണ് കരുതുന്നത്. അന്്ന് ഞാന് വിഷം എന്നേ പറഞ്ഞുളളു. ഇന്ന് കൊടുംവിഷം എന്ന് പറയും അത്രയേയുളളു'- മുഖ്യമന്ത്രി പറഞ്ഞു.