കൊച്ചി: ആലുവയില് അഞ്ചുവയസുകാരിയെ പീഡിപ്പിച്ച് കൊലപ്പെടുത്തിയ കേസില് പ്രതി അസ്ഫാഖ് ആലം കുറ്റക്കാരനെന്ന് കോടതി. പ്രതിക്കെതിരെ ചുമത്തിയ പതിനാറ് കുറ്റങ്ങളും പ്രോസിക്ക്യൂഷന് തെളിയിക്കാനായെന്ന് കോടതി പറഞ്ഞു. നാടിനെ ഞെട്ടിച്ച ക്രൂരകൃത്യം നടന്ന് നൂറാം ദിവസമാണ് എറണാകുളം പോക്സോ കോടതിയുടെ വിധിപ്രസ്താവം. പ്രതി കുറ്റക്കാരനാണെന്ന് കണ്ടെത്തിയ വിധിയില് വ്യാഴാഴ്ച്ച വാദം നടക്കും. അപൂര്വ്വങ്ങളില് അപൂര്വ്വമായ കേസായതിനാല് പ്രതിക്ക് വധശിക്ഷ നല്കണമെന്ന് പ്രോസിക്ക്യൂഷന് ആവശ്യപ്പെട്ടു. അസ്ഫാഖിനെതിരെ ചുമത്തിയ 16 കുറ്റങ്ങളില് നാലെണ്ണവും വധശിക്ഷ വരെ ലഭിക്കാവുന്ന കുറ്റങ്ങളാണ്. കൊലപാതകം, ബലാത്സംഗം, തട്ടിക്കൊണ്ടുപോയുളള പീഡനം തുടങ്ങിയ വകുപ്പുകളാണ് ഇയാള്ക്കെതിരെ ചുമത്തിയിരിക്കുന്നത്.
പ്രതിയുടെ മാനസിക നില പരിശോധിക്കണമെന്ന് പ്രതിഭാഗം അഭിഭാഷകന് ആവശ്യപ്പെട്ടപ്പോള് പ്രതിക്ക് യാതൊരു മാനസിക പ്രശ്നവുമില്ലെന്ന് പ്രോസിക്ക്യൂഷന് വാദിച്ചു. പ്രതി പരിവര്ത്തനത്തിന് വിധേയനാകുന്നുണ്ടോയെന്നും കോടതി ചോദിച്ചു. അടുത്ത വാദം നടക്കുന്ന ദിവസം ഇതുസംബന്ധിച്ച റിപ്പോര്ട്ട് നല്കാന് ജയില് സൂപ്രണ്ടിനോടും സര്ക്കാരിനോടും കോടതി ആവശ്യപ്പെട്ടു. പ്രതിയുടെ മാനസിക നില കൂടി പരിശോധിച്ചതിനുശേഷമാകും ശിക്ഷ വിധിക്കുക.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2023 ജൂലൈ 28-നാണ് കേരളത്തെ ഞെട്ടിച്ച ക്രൂര കൊലപാതകം നടന്നത്. വീട്ടില് കളിച്ചുകൊണ്ടിരിക്കുകയായിരുന്ന അഞ്ചുവയസുകാരിയെ ശീതളപാനീയം വാങ്ങിത്തരാമെന്ന് വാഗ്ദാനം നല്കി അസ്ഫാഖ് ആലം കൂട്ടിക്കൊണ്ടുപോവുകയായിരുന്നു. തുടര്ന്ന് ആലുവ മാര്ക്കറ്റിലെത്തിച്ച് പീഡിപ്പിച്ച് കൊലപ്പെടുത്തുകയായിരുന്നു. സംഭവം നടന്ന് 34-ാം ദിവസം പൊലീസ് കുറ്റപത്രം സമര്പ്പിച്ചു. തുടര്ച്ചയായി 26 ദിവസം നീണ്ടുനിന്ന വിചാരണയാണ് കേസില് നടന്നത്. പെണ്കുട്ടിയുടെ ചെരിപ്പും വസ്ത്രവുമുള്പ്പെടെ 10 തൊണ്ടിമുതലും സിസിടിവി ദൃശ്യങ്ങളുമാണ് തെളിവായി പ്രോസിക്ക്യൂഷന് കോടതിയില് ഹാജരാക്കിയത്.