തിരുവനന്തപുരം: ക്ഷേത്രപ്രവേശന വിളംബരത്തിന്റെ 87-ാം വാര്ഷിക ആഘോഷത്തിന്റെ ഭാഗമായി തിരുവിതാംകൂര് ദേവസ്വം ബോര്ഡ് പുറത്തിറക്കിയ നോട്ടീസ് വിവാദത്തില്. തിരുവിതാംകൂര് രാജകുടുംബത്തെ പുകഴ്ത്തിക്കൊണ്ടുളള സാംസ്കാരിക- പുരാവസ്തു വകുപ്പിന്റെ നോട്ടീസാണ് വിവാദമായത്. തിരുവിതാംകൂര് രാജ്ഞിമാരായ ഹെര് ഹൈനസ് പൂയം തിരുനാള് ഗൗരി പാര്വ്വതീഭായ് തമ്പുരാട്ടിയും ഹെര് ഹൈനസ് അശ്വതി തിരുനാള് ഗൗരീലക്ഷ്മി ഭായ് തമ്പുരാട്ടിയും ഭദ്രദീപം തെളിയിച്ച് മഹാരാജാവിന്റെ പ്രതിമയ്ക്കു മുന്നില് പുഷ്പാര്ച്ചന നടത്തുന്നുവെന്നാണ് നോട്ടീസില് പറയുന്നത്. തിങ്കളാഴ്ച്ച നന്തന്കോടുളള ദേവസ്വം ബോര്ഡ് ആസ്ഥാനത്ത് നടക്കുന്ന പരിപാടി ഉദ്ഘാടനം ചെയ്യുന്നത് തിരുവിതാംകൂര് ദേവസ്വം ബോര്ഡ് അധ്യക്ഷന് അഡ്വ. കെ അനന്തഗോപനാണ്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
തിരുവിതാംകൂറിലെ ദളിത്- പിന്നാക്ക വിഭാഗങ്ങള് പൊരുതി നേടിയതാണ് ക്ഷേത്രത്തില് പ്രവേശിക്കാനുളള അവകാശം. വൈക്കം സത്യാഗ്രഹമടക്കം നിരവധി പോരാട്ടങ്ങളുടെ കനല്വഴികള് താണ്ടിയാണ് ആ മൗലികാവകാശം കേരളത്തിലെ ജനങ്ങള് നേടിയെടുത്തത്. അതല്ലാതെ രാജാക്കന്മാര് ഔദാര്യം പോലെ നല്കിയതല്ല എന്ന വിമര്ശനമാണ് സമൂഹമാധ്യമങ്ങളില് ഉയരുന്നത്. 'ഡോ. പല്പ്പു ഉള്പ്പെടെയുളള നിരവധി മഹാപ്രതിഭകളുടെ കണ്ണീര് വീണ സ്ഥലമാണ് തിരുവിതാംകൂര് കൊട്ടാരം. ആലപ്പുഴയിലെ ഗ്രാമങ്ങളില് വീണ ചോര ഇനിയും ഉണങ്ങിയിട്ടില്ല. രണ്ട് അഭിനവ തമ്പുരാട്ടിമാരിലൂടെ ആ നാടുവാഴിത്ത മേധാവിത്തത്തെയും സംസ്കാരത്തെയും എഴുന്നളളിക്കാനുളള ദേവസ്വം ബോര്ഡിന്റെ നീക്കം അപലപനീയമാണ്'- എന്ന് പുരോഗമന കലാസാഹിത്യ സംഘം ജനറല് സെക്രട്ടറി അശോകന് ചെരുവില് പറഞ്ഞു.