കണ്ണൂര്: നവകേരള സദസിന്റെ ഭാഗമായി മുഖ്യമന്ത്രി പിണറായി വിജയനും മന്ത്രിമാരും സഞ്ചരിക്കുന്ന ബസിനുനേരെ കരിങ്കൊടി കാണിച്ച യൂത്ത് കോണ്ഗ്രസ് പ്രവര്ത്തകരെ മര്ദ്ദിച്ച സംഭവത്തില് കേസെടുത്തു. 14 സിപിഎം, ഡിവൈഎഫ്ഐ പ്രവര്ത്തകര്ക്കെതിരെ പഴയങ്ങാടി പൊലീസാണ് കേസെടുത്തത്. കൊല്ലണമെന്ന ഉദ്ദേശത്തോടെ യൂത്ത് കോണ്ഗ്രസ് പ്രവര്ത്തകനായ സുധീഷ് വെളളച്ചാലിനെ തടഞ്ഞുനിര്ത്തി ഹെല്മെറ്റും ചെടിച്ചട്ടിയും ഇരുമ്പുവടിയും ഉപയോഗിച്ച് തലയ്ക്കടിച്ച് പരിക്കേല്പ്പിച്ചുവെന്നാണ് കേസ്. ആക്രമണം തടഞ്ഞവരെയും മര്ദ്ദിച്ചെന്നും മുഖ്യമന്ത്രിയെ കരിങ്കൊടി കാണിച്ചതിലുളള രാഷ്ട്രീയ വിരോധമാണ് ആക്രമണത്തിനു പിന്നിലെന്നും എഫ് ഐ ആറില് പറയുന്നു.
കഴിഞ്ഞ ദിവസം കണ്ണൂര് കല്യാശ്ശേരി മണ്ഡലത്തിലെ പഴയങ്ങാടി എരിപുരത്തുവെച്ചായിരുന്നു സംഭവം. ബസിനുനേരെ കരിങ്കൊടി കാണിച്ചതിനുപിന്നാലെ സമീപത്തുണ്ടായിരുന്ന ഇടതുപ്രവര്ത്തകര് കൂട്ടംചേര്ന്ന് യൂത്ത് കോണ്ഗ്രസുകാരെ മര്ദ്ദിക്കുകയായിരുന്നു. യുവാക്കളെ നിലത്തിട്ട് ചവിട്ടുന്നതിന്റെയും ഹെല്മെറ്റ് കൊണ്ട് തലയ്ക്കടിക്കുന്നതിന്റെയും ദൃശ്യങ്ങളും പുറത്തുവന്നിരുന്നു. കോണ്ഗ്രസ് പ്രവര്ത്തകരുടെ വാഹനങ്ങളടക്കം സംഘം അടിച്ചുതകര്ത്തു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, മുഖ്യമന്ത്രിക്കെതിരെ പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ നരനായാട്ട് നടത്തി സ്വൈര്യമായി സഞ്ചരിക്കാമെന്ന് മുഖ്യമന്ത്രിയും മന്ത്രിമാരും കരുതേണ്ടെന്ന് കെപിസിസി അധ്യക്ഷന് കെ സുധാകരന് പറഞ്ഞു. അധികാരത്തിന്റെ ബലത്തില് ചോരതിളയ്ക്കുന്ന സിപിഎം ക്രിമിനലുകള്ക്ക് അത് തണുപ്പിക്കാന് കോണ്ഗ്രസ് പ്രവര്ത്തകരെ പിടിച്ചുകൊടുക്കുന്നതാണോ പൊലീസിന്റെ നിയമപാലനമെന്ന് അദ്ദേഹം ചോദിച്ചു.
നിയമം കയ്യിലെടുക്കുന്ന സിപിഎം ക്രിമിനലുകള്ക്ക് സംരക്ഷണമൊരുക്കി യൂത്ത് കോണ്ഗ്രസ്- കെ എസ് യു പ്രവര്ത്തകരെ കായികമായി കൈകാര്യം ചെയ്യാനാണ് ഭാവമെങ്കില് കോണ്ഗ്രസ് അതിനെ തെരുവില് നേരിടുമെന്നും പ്രതിഷേധക്കാരെ ഗുണ്ടകളെ ഉപയോഗിച്ച് തല്ലിയൊതുക്കി ജനങ്ങളുടെ പരാതി പോലും കേള്ക്കാതെ ആഢംബര ബസില് ഉല്ലാസയാത്ര നടത്താന് മുഖ്യമന്ത്രിയെ അനുവദിക്കില്ലെന്നും കെ സുധാകരന് കൂട്ടിച്ചേര്ത്തു.