കൊച്ചി: നവകേരള സദസിനിടെ സിപിഎം ബ്രാഞ്ച് കമ്മിറ്റി അംഗത്തെ ഡിവൈഎഫ്‌ഐ പ്രവര്‍ത്തകര്‍ മര്‍ദ്ദിച്ച സംഭവം പാര്‍ട്ടി അന്വേഷിക്കുമെന്ന് ജില്ലാ നേതൃത്വം. വിഷയം അടിയന്തരമായി അന്വേഷിക്കുന്നതിന് തൃക്കാക്കര ഏരിയാ സെക്രട്ടറിക്ക് നിര്‍ദേശം നല്‍കിയെന്ന് എറണാകുളം ജില്ലാ സെക്രട്ടറി സി എന്‍ മോഹനന്‍ പറഞ്ഞു. പാര്‍ട്ടി പ്രവര്‍ത്തകനെ മര്‍ദ്ദിച്ചതില്‍ മാത്രമാണ് അന്വേഷണം. വെളളിയാഴ്ച്ചയാണ് മറൈന്‍ ഡ്രൈവില്‍ നടന്ന നവകേരള സദസിനിടെ സിപിഎം തമ്മനം ഈസ്റ്റ് ബ്രാഞ്ച് കമ്മിറ്റിയംഗം റയീസിന് മര്‍ദ്ദനമേറ്റത്. ഡിഎസ്എ പ്രവര്‍ത്തകനാണെന്ന് കരുതിയായിരുന്നു മര്‍ദ്ദനം.
ഡിവൈഎഫ് ഐ പ്രവര്‍ത്തകര്‍ ഡിഎസ്എ പ്രവര്‍ത്തകരെ വളഞ്ഞിട്ട് അടിക്കുന്നതിനിടെയാണ് റയീസിനും മര്‍ദ്ദനമേറ്റത്. പാര്‍ട്ടി പ്രവര്‍ത്തകനാണെന്ന് പറഞ്ഞിട്ടും മര്‍ദ്ദനം തുടര്‍ന്നെന്നും ഇനി പാര്‍ട്ടിയില്‍ പ്രവര്‍ത്തിക്കാനില്ലെന്നും റയീസ് പറഞ്ഞു. 'പൊലീസ് കസ്റ്റഡിയിലെടുത്ത എന്നെ ബ്രാഞ്ച് സെക്രട്ടറിയാണ് ജാമ്യത്തിലെടുത്തത്. ഒന്നര വര്‍ഷം മുന്‍പാണ് പാര്‍ട്ടിയില്‍ അംഗമായത്. അടികൊളളാനായി ഇനി ആ പാര്‍ട്ടിയിലേക്കില്ല'- റയീസ് കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
നവകേരള സദസിനിടെ ഡിഎസ്എ പ്രവര്‍ത്തകര്‍ ലഖുലേഖ വിതരണം ചെയ്തതാണ് പ്രകോപനത്തിന് കാരണമായത്. പരിപാടി നടക്കുന്ന സദസില്‍ ഇവര്‍ക്കടുത്തായിരുന്നു റയീസ് ഇരുന്നിരുന്നത്. ഒരു ഫോണ്‍കോള്‍ വന്ന് പുറത്തിറങ്ങിയ റയീസിനെ ആദ്യം അഞ്ചുപേര്‍ ചേര്‍ന്ന് തടയുകയും ഫോണ്‍ പരിശോധിച്ച് വിട്ടയയ്ക്കുകയും ചെയ്തു. പുറത്തേക്കിറങ്ങിയതോടെ ഒരു സംഘം പ്രവര്‍ത്തകരെത്തി മര്‍ദ്ദിക്കുകയായിരുന്നു
