തൃശൂര്: തൃശൂര് പൂരത്തിന് വടക്കുന്നാഥ ക്ഷേത്രത്തില് ചെരിപ്പ് ധരിച്ചെത്തുന്നത് വിലക്കി ഹൈക്കോടതി. ജസ്റ്റിസ് അനില് കെ നരേന്ദ്രന്, ജി ഗിരീഷ് എന്നിവരടങ്ങുന്ന ദേവസ്വം ബെഞ്ചാണ് സുപ്രധാന വിധി പുറപ്പെടുവിച്ചത്. ക്ഷേത്രത്തിലെ ആചാരങ്ങള്ക്കും പാരമ്പര്യങ്ങള്ക്കും വിധേയമായി വേണം ആരാധനയെന്ന് കോടതി നിരീക്ഷിച്ചു. ക്ഷേത്രത്തില് നിത്യപൂജകളും ചടങ്ങുകളും ഉത്സവങ്ങളും നടക്കുന്നുണ്ടെന്ന് കൊച്ചിന് ദേവസ്വം ബോര്ഡ് ഉറപ്പുവരുത്തണമെന്നും ദേവസ്വം ബെഞ്ച് ഉത്തരവില് പറയുന്നു.
കഴിഞ്ഞ വര്ഷത്തെ പൂരത്തിന് ആചാരവിരുദ്ധമായ സംഭവങ്ങളുണ്ടായെന്ന് ചൂണ്ടിക്കാട്ടി തൃശൂര് സ്വദേശി കെ നാരായണന്കുട്ടി പരാതി നല്കിയിരുന്നു. തെക്കേ ഗോപുര നടയില് ഭക്ഷണാവശിഷ്ടങ്ങള് തളളിയെന്നും പ്ലാസ്റ്റിക് അടക്കമുളള മാലിന്യങ്ങള് കിടക്കുന്നുവെന്നുമുളള മാധ്യമവാര്ത്തയില് ഹൈക്കോടതി സ്വമേധയാ കേസെടുക്കുകയും ചെയ്തിരുന്നു. ഈ രണ്ട് കേസുകള് പരിഗണിച്ചാണ് ഹൈക്കോടതി സുപ്രധാന ഉത്തരവ് പുറപ്പെടുവിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
തേക്കിന്കാട് മൈതാനം പ്ലാസ്റ്റിക് വിമുക്തമാണെന്ന് ഉറപ്പാക്കാന് കൊച്ചിന് ദേവസ്വം ബോര്ഡ് സെക്രട്ടറിക്കും മൈതാനത്ത് പരിസ്ഥിതി സുരക്ഷാ നിലവാരം പാലിക്കുന്നുണ്ടെന്ന് ഉറപ്പുവരുത്താന് കോര്പ്പറേഷന് സെക്രട്ടറിക്കും കോടതി നിര്ദേശം നല്കി. രാഷ്ട്രീയ പാര്ട്ടികളുടെ ഹോര്ഡിംഗുകളോ കൊടികളോ പരസ്യബോര്ഡുകളോ സ്ഥാപിക്കാന് പാടില്ലെന്നും പ്രദേശത്ത് പൊലീസ് പതിവായി പട്രോളിംഗ് നടത്തണമെന്നും കോടതി പറഞ്ഞു.