കോഴിക്കോട്: കോന്നാട് ബീച്ചിലെത്തിയ യുവതീ-യുവാക്കളെ മഹിളാ മോര്‍ച്ച പ്രവര്‍ത്തകര്‍ ഭീഷണിപ്പെടുത്തി, ചൂലെടുത്ത് ഓടിച്ച സംഭവത്തില്‍ പ്രതിഷേധവുമായി ഡി വൈ എഫ് ഐ. കോഴിക്കോടിന്റെ സ്വാഭാവിക ജീവിതത്തെ തടസപ്പെടുത്തിയാല്‍ മോര്‍ച്ചക്കാരെ മോര്‍ച്ചറിയിലേക്ക് അയക്കുമെന്ന് ഡി വൈ എഫ് ഐ സംസ്ഥാന പ്രസിഡന്റ് വി വസീഫ് പറഞ്ഞു. ബീച്ചില്‍ യുവാക്കളെ തടഞ്ഞാല്‍ ശക്തമായി തിരിച്ചടിക്കുമെന്നും വസീഫ് മുന്നറിയിപ്പ് നല്‍കി. 'മഹിളാ മോര്‍ച്ചയുടെ സദാചാര ഗുണ്ടായിസത്തിനെതിരെ' എന്ന മുദ്രാവാക്യത്തോടെയാണ് ഡി വൈ എഫ് ഐ കോന്നാട് ബീച്ചില്‍ പ്രതിഷേധിച്ചത്.
ആണ്‍-പെണ്‍ സൗഹൃദങ്ങളെ ഇല്ലാതാക്കാനുളള ശ്രമമാണ് മഹിളാ മോര്‍ച്ച നടത്തുന്നതെന്ന് ഡി വൈ എഫ് ഐ കോഴിക്കോട് ജില്ലാ സെക്രട്ടറി പി സി ഷൈജു പറഞ്ഞു. ശ്രീരാമസേനയ്ക്ക് സമാനമായ പ്രവര്‍ത്തനങ്ങളാണ് മഹിളാ മോര്‍ച്ച നടത്തിയതെന്നും കേരളത്തില്‍ ഇത്തരത്തിലുളള നിലപാടുകള്‍ വിലപ്പോകില്ലെന്നും ഷൈജു കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
വ്യാഴാഴ്ച്ച വൈകീട്ടോടെയാണ് പ്രദേശത്തെ ബിജെപി പ്രവര്‍ത്തകരായ ഇരുപതിലധികം സ്ത്രീകള്‍ ചൂലുമായി ബീച്ചിലെത്തിയത്. സാമൂഹ്യവിരുദ്ധരുടെ ശല്യം വര്‍ധിച്ചെന്നും പ്രദേശവാസികള്‍ക്ക് ബീച്ചിലിറങ്ങാന്‍ കഴിയാത്ത സാഹചര്യമാണെന്നും ചൂണ്ടിക്കാട്ടിയാണ് ഇവര്‍ ചൂലെടുത്ത് യുവതീ-യുവാക്കളെ ഓടിച്ചത്. സദാചാര പൊലീസിംഗല്ല, കുട്ടികളെ അമ്മമാരുടെ സ്ഥാനത്തുനിന്ന് ഉപദേശിക്കുക മാത്രമാണ് ചെയ്തത് എന്നാണ് മഹിളാ മോര്‍ച്ച പ്രവര്‍ത്തകരുടെ വിശദീകരണം.
