ഡല്ഹി: കര്ഷക സമരത്തില് പങ്കെടുക്കുന്നവരുടെ പാസ്പോര്ട്ട് റദ്ദാക്കാനൊരുങ്ങി ഹരിയാന പൊലീസ്. പ്രതിഷേധത്തിന്റെ പേരില് അക്രമം സൃഷ്ടിച്ചെന്നും പൊതുമുതല് നശിപ്പിച്ചെന്നും ചൂണ്ടിക്കാട്ടിയാണ് പാസ്പോര്ട്ട് റദ്ദാക്കുന്നത്. അംബാല ഡിഎസ്പി ജോഗീന്ദര് ശര്മ്മയാണ് ഇക്കാര്യം അറിയിച്ചത്. പഞ്ചാബ്-ഹരിയാന അതിര്ത്തിയില് പൊതുമുതല് നശിപ്പിക്കുന്നവരുടെ പാസ്പോര്ട്ടും വിസയും റദ്ദാക്കുമെന്നാണ ജോഗീന്ദര് ശര്മ്മ പറഞ്ഞത്. 'അക്രമത്തില് പങ്കെടുത്തവരെ തിരിച്ചറിഞ്ഞിട്ടുണ്ട്. സിസിടിവിയിലൂടെയും ഡ്രോണ് ക്യാമറകളിലൂടെയുമാണ് ഇവരെ തിരിച്ചറിഞ്ഞത്. ഇവരുടെ പാസ്പോര്ട്ടും വിസയും റദ്ദാക്കാന് കേന്ദ്ര ആഭ്യന്തര മന്ത്രാലയത്തോട് അഭ്യര്ത്ഥിക്കും. അതിനുളള നടപടികളുമായി മുന്നോട്ടുപോകും'- ജോഗീന്ദര് ശര്മ്മ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഡല്ഹി ചലോ മാര്ച്ച് സുരക്ഷാ ഉദ്യോഗസ്ഥര് തടഞ്ഞതിനുപിന്നാലെ ഫെബ്രുവരി 13 മുതല് പഞ്ചാബില് നിന്നുളള കര്ഷകര് പഞ്ചാബ്-ഹരിയാന അതിര്ത്തിയിലെ ശംബു, ഖനൗരി പോയിന്റുകളില് ക്യാംപ് ചെയ്യുകയാണ്. വിളകള്ക്ക് മിനിമം താങ്ങുവില, കര്ഷക കടം എഴുതിത്തളളല് തുടങ്ങിയ ആവശ്യങ്ങള് ഉന്നയിച്ചാണ് കര്ഷകര് പ്രതിഷേധിക്കുന്നത്. ഹരിയാന പൊലീസ് സര്വ്വസന്നാഹങ്ങളും ഉപയോഗിച്ച് മാര്ച്ച് തടയുന്നുണ്ടെങ്കിലും പ്രതിഷേധത്തില് നിന്നും പിന്മാറാന് കര്ഷകര് തയ്യാറായിട്ടില്ല. സമരത്തിന്റെ അടുത്ത ഘട്ടം കര്ഷകര് ഇന്ന് പ്രഖ്യാപിക്കും. അടുത്ത മാസം ഡല്ഹിയില് നടത്തുമെന്ന് പ്രഖ്യാപിച്ച മഹാപഞ്ചായത്തിന്റെ ഒരുക്കങ്ങള് ഇന്ന് ചേരുന്ന കര്ഷക സംഘടനാ നേതാക്കളുടെ യോഗത്തില് വിലയിരുത്തും.