തിരുവനന്തപുരം: സംസ്ഥാന സര്‍ക്കാരിന്റെ കെ റൈസ് വിതരണം ഈ മാസം 12 മുതല്‍ ആരംഭിക്കുമെന്ന് ഭക്ഷ്യമന്ത്രി ജി ആര്‍ അനില്‍. സപ്ലൈകോ വഴിയാകും അരി വിതരണമെന്നും ജയ അരി കിലോയ്ക്ക് 29 രൂപ നിരക്കിലും മട്ട അരിയും കുറുവ അരിയും 30 രൂപ നിരക്കിലുമാകും വിതരണം ചെയ്യുകയെന്നും മന്ത്രി വാര്‍ത്താസമ്മേളനത്തില്‍ അറിയിച്ചു. തിരുവനന്തപുരം മേഖലയില്‍ ജയ അരിയും കോട്ടയം, എറണാകുളം മേഖലയില്‍ മട്ട അരിയും പാലക്കാട്, കോഴിക്കോട് മേഖലകളില്‍ കുറുവ അരിയും വിതരണം ചെയ്യും. ഒരു മാസം അഞ്ച് കിലോ അരിയാണ് വിതരണം ചെയ്യുക.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കേന്ദ്രസര്‍ക്കാര്‍ ഭാരത് റൈസ് എന്ന പേരില്‍ വിതരണം ചെയ്യുന്നത് റേഷന്‍ കടകള്‍ വഴി വിതരണം ചെയ്യുന്ന അതേ അരിയാണെന്ന് മന്ത്രി ജി ആര്‍ അനില്‍ ആരോപിച്ചു. ഭാരത് അരിയുടെ വില 29 രൂപ ആണെങ്കിലും നാഫെഡ് അടക്കമുളള സ്ഥാപനങ്ങള്‍ അത് വാങ്ങുന്നത് 18.59 രൂപയ്ക്കാണ്. 10.41 രൂപ ലാഭത്തിനാണ് ആ അരി വില്‍ക്കുന്നത്. എന്നാല്‍ 9.50 രൂപ മുതല്‍ 11.11 രൂപ വരെ ബാധ്യത ഏറ്റെടുത്താണ് ശബരി കെ റൈസ് കേരളാ സര്‍ക്കാര്‍ പൊതുജനത്തിന് നല്‍കുന്നത്.'- മന്ത്രി പറഞ്ഞു.
കേരളത്തിലെ ഭാരത് റൈസ് വിതരണമാണ് ബിജെപിയുടെ പ്രധാന തെരഞ്ഞെടുപ്പ് പ്രചരണായുധം. ഇത് തിരിച്ചടിയാകുമോ എന്ന ആശങ്ക കൂടി സാമ്പത്തിക പ്രതിസന്ധിക്കിടെയുളള സംസ്ഥാന സര്‍ക്കാരിന്റെ കെ റൈസ് പ്രഖ്യാപനത്തിന് പിന്നിലുണ്ടെന്നാണ് വിലയിരുത്തല്‍.
