തിരുവനന്തപുരം: വിവാദ സിനിമ 'ദി കേരളാ സ്റ്റോറി' ദൂരദര്ശനില് പ്രദര്ശിപ്പിക്കുന്നതിനെതിരെ തെരഞ്ഞെടുപ്പ് കമ്മീഷന് പരാതി നല്കി പ്രതിപക്ഷ നേതാവ് വി ഡി സതീശന്. സമൂഹത്തില് ഭിന്നിപ്പുണ്ടാക്കി രാഷ്ട്രീയ ലാഭമുണ്ടാക്കാനാണ് ശ്രമമെന്നും സംഘപരിവാര് താല്പ്പര്യമാണ് സിനിമ പ്രദര്ശിപ്പിക്കുന്നതിന് പിന്നിലെന്നും വി ഡി സതീശന് പറഞ്ഞു. സിനിമ പ്രദര്ശിപ്പിക്കുന്നത് തെരഞ്ഞെടുപ്പ് പെരുമാറ്റച്ചട്ടത്തിന്റെ ലംഘനമാണെന്നും അദ്ദേഹം ചൂണ്ടിക്കാട്ടി.
'കേരളത്തെക്കുറിച്ചുളള അസത്യങ്ങള് കുത്തിനിറച്ച കേരളാ സ്റ്റോറി എന്ന സിനിമ ദൂരദര്ശനില് പ്രദര്ശിപ്പിക്കാനുളള നീക്കത്തില് നിന്ന് കേന്ദ്രസര്ക്കാര് പിന്മാറണം. അസത്യങ്ങളുടെ കെട്ടുകാഴ്ച്ചയായ കേരളാ സ്റ്റോറി പ്രദര്ശിപ്പിക്കുന്നതിലൂടെ മതേതര സമൂഹത്തില് ഭിന്നിപ്പുണ്ടാക്കുകയെന്ന തന്ത്രമാണ് മോദിയുടെ നേതൃത്വത്തിലുളള സംഘപരിവാര് ഭരണകൂടം നടപ്പാക്കുന്നത്. ഭിന്നിപ്പിന്റെ രാഷ്ട്രീയം കേരളത്തില് ചിലവാകില്ലെന്ന് ബോധ്യമായ സംഘപരിവാര് കേന്ദ്രസര്ക്കാര് സ്ഥാപനമായ ദൂരദര്ശനെ രാഷ്ട്രീയ ലാഭത്തിനായി ഉപയോഗിക്കുന്നത് അംഗീകരിക്കാനാവില്ല'- വി ഡി സതീശന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കേരളാ സ്റ്റോറി പ്രദര്ശിപ്പിക്കാനുളള തീരുമാനം ദൂരദര്ശന് അടിയന്തരമായി പിന്വലിക്കണമെന്ന് മുഖ്യമന്ത്രി പിണറായി വിജയനും പറഞ്ഞു. തെരഞ്ഞെടുപ്പ് അടുത്തിരിക്കെ രാജ്യത്തിന്റെ ഔദ്യോഗിക വാര്ത്താ സംപ്രേക്ഷണ സ്ഥാപനത്തെ ഉപയോഗിച്ച് കേരളത്തെ ഇകഴ്ത്താനുളള നീക്കത്തില് നിന്ന് കേന്ദ്രസര്ക്കാര് പിന്മാറണമെന്നും സംഘപരിവാറിന്റെ വര്ഗീയ അജണ്ടയ്ക്കനുസരിച്ച് പ്രവര്ത്തിക്കുന്ന കളിപ്പാവയായി ദൂരദര്ശന് പോലുളള പൊതുമേഖലാ സ്ഥാപനങ്ങളെ മാറ്റരുതെന്നും അദ്ദേഹം കൂട്ടിച്ചേര്ത്തു.
ഇന്ന് രാത്രി 8 മണിക്കാണ് ദൂരദര്ശനില് കേരളാ സ്റ്റോറി സംപ്രേക്ഷണം ചെയ്യുന്നത്. 'ലോകത്തെ നടുക്കിയ കേരളത്തിന്റെ കഥ നിങ്ങളുടെ മുന്നിലേക്ക്' എന്ന ക്യാപ്ഷനോടെയാണ് ദൂരദര്ശന് ചിത്രത്തെക്കുറിച്ചുളള അറിയിപ്പ് നല്കിയിരിക്കുന്നത്.