പ്രധാനമന്ത്രി നരേന്ദ്ര മോദി വെറുമൊരു ഹിന്ദു ഭൂരിപക്ഷ വാദിയായി സ്വയം ചെറുതാവുകയാണെന്ന് ചരിത്രകാരന് രാമചന്ദ്ര ഗുഹ. മോദിക്ക് തന്റെ വര്ഗീയ ഭൂതകാലം കുടഞ്ഞെറിയാന് സാധിക്കുന്നില്ലെന്നും ഗുഹ അഭിപ്രായപ്പെട്ടു. മാതൃഭൂമി ആഴ്ചപ്പതിപ്പിലെ ഭൂതവും വര്ത്തമാനവും എന്ന പംക്തിയിലാണ് രാമചന്ദ്രഗുഹ ഇക്കാര്യം വ്യക്തമാക്കുന്നത്.
തനിക്ക് ചുറ്റിലുമാണ് ലോകം കറങ്ങുന്നതെന്ന് വിശ്വസിക്കുന്ന ആത്മരതിക്കാരനാണ് മോദിയെന്നും രാമചന്ദ്ര ഗുഹ ലേഖനത്തില് പറയുന്നു. സാമ്പത്തിക വിദഗ്ധരാവട്ടെ സ്വന്തം പാര്ട്ടിയിലുള്ള നേതാക്കളാവട്ടെ സ്വതന്ത്ര നിലപാടുള്ള ആരുമായും ദീര്ഘകാലം ഒന്നിച്ച് പ്രവര്ത്തിക്കാന് നരേന്ദ്ര മോദിക്ക് സാധിക്കുന്നില്ല. സ്വയം ശിക്ഷിതനായ മോദിക്ക് വലിയ സര്വകലാശാലകളില് നിന്ന് വലിയ ബിരുദം നേടിയവരില് അവിശ്വാസമുണ്ടെന്നും ഗുഹ അഭിപ്രായപ്പെട്ടു. എങ്ങനെയാണ് അമിത് ഷാ മോദിക്ക് സമനായി ഇന്ത്യന് രാഷ്ട്രീയത്തില് മാറുന്നതെന്നും ഗുഹ ലേഖനത്തില് നിരീക്ഷിക്കുന്നുണ്ട്.