ഡൽഹിയിൽ നിർത്തിവെച്ച മെട്രോ സർവീസുകൾ ഉടൻതന്നെ പുനരാരംഭിക്കണമെന്ന് മുഖ്യമന്ത്രി അരവിന്ദ് കെജ്രിവാൾ. കൊറോണ വൈറസ് വ്യാപനത്തെ തുടർന്നാണ് കേന്ദ്രസർക്കാർ മെട്രോ സർവീസുകൾ നിർത്തിവെച്ചത്.
രോഗവ്യാപനം ഡൽഹിയിൽ കുറഞ്ഞുവരികയാണെന്നും അതിനാൽ പരീക്ഷണാടിസ്ഥാനത്തിൽ മെട്രോ സർവീസുകൾ പുനരാരംഭിക്കണമെന്നും അദ്ദേഹം പറഞ്ഞു. ദേശീയ തലസ്ഥാന നഗരത്തിന് മറ്റു നഗരങ്ങളെക്കാൾ പരിഗണന നൽകണമെന്നും കെജ്രിവാൾ കൂട്ടിച്ചേർത്തു. ഈ വിഷയം നിരവധി തവണ കേന്ദ്രത്തെ അറിയിച്ചിട്ടുണ്ടെന്നും ഇക്കാര്യത്തിൽ ഉടൻതന്നെ നടപടി സ്വീകരിക്കുമെന്ന് പ്രതീക്ഷിക്കുന്നുവെന്നും അദ്ദേഹം പറഞ്ഞു.
മാർച്ച് 22ൽ ആരംഭിച്ച ലോക്ഡൗൺ മുതൽ രാജ്യത്തെ മെട്രോ സർവീസുകൾ എല്ലാം നിർത്തലാക്കിയിരുന്നു. പിന്നീട് മിക്ക മേഖലകളും പുനരാരംഭിച്ചെങ്കിലും മെട്രോ സേവനങ്ങൾ തുടങ്ങിയില്ല.