മഹാകവി അക്കിത്തത്തിന് ഇന്ന് ജ്ഞാനപീഠ പുരസ്‌കാരം സമ്മാനിച്ചു. അക്കിത്തത്തിന്റെ കുമരനല്ലൂരിലെ വീട്ടില്‍ വച്ച് കൊവിഡ് മാനദണ്ഡങ്ങളനുസരിച്ചായിരുന്നു പുരസ്‌ക്കാര ദാനം. ജ്ഞാനപീഠം നേടുന്ന ആറാമത്തെ മലയാളിയാണ് അക്കിത്തം. 2019-ലായിരുന്നു പുരസ്‌കാരത്തിന് അക്കിത്തം അര്‍ഹനായത്.
മുഖ്യമന്ത്രി പിണറായി വിജയന്‍ ഓണ്‍ലൈനില്‍ ഉദ്ഘാടനം നിര്‍വ്വഹിച്ച ചടങ്ങില്‍, മന്ത്രി എ.കെ. ബാലനാണ് വീട്ടിലെത്തി പുരസ്‌കാരം സമ്മാനിച്ചത്. 11 ലക്ഷം രൂപയും സരസ്വതി ശില്‍പവുമടങ്ങുന്നതാണ് ജ്ഞാനപീഠം. 93-ാം വയസിലാണ് കവിക്ക് പുരസ്‌കാര ലഭിക്കുന്നത്. പാലക്കാട് കുമരനല്ലൂര്‍ സ്വദേശിയായ അക്കിത്തം 40 ലധികം കൃതികള്‍ മലയാളത്തില്‍ രചിച്ചിട്ടുള്ള കവിയാണ്.
അക്കിത്തത്തിന് പുരസ്‌കാരം ലഭിച്ചതോടെ പാലക്കാട് ജില്ലയിലെ കുമരനല്ലൂര്‍ ഗ്രാമത്തില്‍ ഇത് രണ്ടാം തവണയാണ് ജ്ഞാനപീഠ പുരസ്‌കാരം എത്തുന്നത്. ആദ്യ തവണ 1995ല്‍ എം.ടി വാസുദേവന്‍ നായരിലൂടെയായിരുന്നു ഇവിടെ പുരസ്‌കാരം എത്തിയത്.
