രാജ്യത്ത് ഫലപ്രദമായി വാക്‌സിൻ വിതരണം സാധ്യമാക്കാൻ ഡിജിറ്റൽ ഐഡി സമ്പ്രദായം കൊണ്ടുവരുമെന്ന് പ്രധാനമന്ത്രി നരേന്ദ്ര മോദി. ഗ്രാൻഡ് ചെല്ലെഞ്ചസിന്റെ വാർഷിക സമ്മേളനത്തിൽ പങ്കെടുക്കുകയായിരുന്ന മോദി രാജ്യത്തെ കൊവിഡ് വാക്‌സിൻ നിർമാണം അവസാന ഘട്ടത്തിലേക്ക് നീങ്ങുകയാണെന്നും വ്യക്തമാക്കി.
കേന്ദ്രത്തിന്റെ കൊവിഡ് പ്രതിരോധ നയങ്ങള്‍ക്കെതിരെ രാജ്യത്ത് വന്‍ വിവാദങ്ങള്‍ നിലനില്‍ക്കുന്നതിനിടെയാണ് മോദിയുടെ പുതിയ പ്രഖ്യാപനം. രാജ്യത്ത് നേരത്തെ ലോക്ഡൗൺ പ്രഖ്യാപിച്ചതാണ് കൊവിഡ് കേസുകൾ വർദ്ധിക്കാനും രാജ്യത്തിന്റെ സമ്പദ് വ്യവസ്ഥ മൊത്തം താറുമാറാകാനും കാരണമായതെന്ന് പലരും ആരോപിച്ചിരുന്നു. കൊവിഡ് പ്രതിരോധത്തിനോ സമ്പദ്‌വ്യവസ്ഥ പുനരുജ്ജീവിപ്പിക്കുന്നതിനോ ആവശ്യമായ നടപടികൾ പ്രധാനമന്ത്രി സ്വീകരിച്ചില്ലെന്ന ആക്ഷേപവും രാജ്യത്ത് പരക്കെ നിലനിൽക്കുന്നുണ്ട്.
പ്രധാനമന്ത്രി രാജ്യത്തെ അഭിസംബോധന ചെയ്ത് സംസാരിച്ച പല ഘട്ടങ്ങളിലും നൽകിയ വാഗ്ദാനങ്ങൾ പാലിച്ചില്ലെന്നും മോദിയുടെ പ്രസംഗം വെറും വാചകക്കസർത്ത് ആണെന്നും കോൺഗ്രസ് അഭിപ്രായപ്പെട്ടിരുന്നു.
