എംജിആറിന്റെ ചിത്രവുമായി ബിജെപി നടത്തിയ പ്രചാരണത്തിനെതിരെ എഐഎഡിഎംകെ രംഗത്ത്. പ്രചാരണത്തിന് ഉപയോഗിക്കാൻ പറ്റുന്ന നേതാക്കളൊന്നും സ്വന്തമായി ഇല്ലേ എന്ന് എഐഎഡിഎംകെ മന്ത്രി ജയകുമാർ ചോദിച്ചു.
കഴിഞ്ഞ ആഴ്ച ബിജെപി പുറത്തിറക്കിയ മൂന്നു മിനിറ്റ് വീഡിയോയിൽ ആണ് എംജിആറിന്റെ ചിത്രം ഉപയോഗിച്ചത്. അതുകൂടാതെ, രാഷ്ട്രീയ റാലികളിലും ചർച്ചകളിലുമെല്ലാം എംജിആറിനെ അഭിസംബോധന ചെയ്യുന്ന 'പൊന്മാനച്ചെമ്മൽ' എന്ന പേരും വീഡിയോയിൽ ഉപയോഗിച്ചിട്ടുണ്ട്. പൊന്മാനച്ചെമ്മലിന്റെ സന്ദേശവാഹകനാണ് പ്രധാനമന്ത്രി മോദി എന്നാണ് വിഡിയോയിൽ പറയുന്നത്. സ്വന്തം നേതാക്കളുടെ ചിത്രം ഉപയോഗിച്ച് പ്രചാരണം നടത്തൂ എന്നും എംജിആറിന്റെ ചിത്രം ഉപയോഗിക്കാനുള്ള അവകാശം മറ്റൊരു രാഷ്ട്രീയപാർട്ടിക്കുമില്ലെന്നും എഐഎഡിഎംകെ വ്യക്തമാക്കി. എഐഎഡിഎംകെ പാർട്ടി സ്ഥാപക നേതാവാണ്‌ പ്രശസ്ത തമിഴ് നടനായ എംജി രാമചന്ദ്രൻ.
മുരുകഭക്തരെ സ്വാധീനിക്കാൻ വേണ്ടിയാണ് ബിജെപി വേൽയാത്ര നടത്തിയത്. സംസ്ഥാനത്തെ പ്രമുഖ മുരുക ക്ഷേത്രങ്ങളെല്ലാം സന്ദർശിക്കാൻ പദ്ധതിയിടുന്ന യാത്ര ബിജെപി നേതാവ് എൽ. മുരുകനാണ് നയിക്കുന്നത്. പ്രധാനമന്ത്രി നരേന്ദ്രമോദി എംജിആറിന്റെ പാതയാണ് പിന്തുടരുന്നതെന്നാണ് എഐഎഡിഎംകെയുടെ വിമർശനത്തിന് ബിജെപി നേതാവ് മറുപടി നൽകിയത്.
