പനാജി: ഗോവയിലെ വിജയം ഒരു തുടക്കം മാത്രമാണെന്ന് അരവിന്ദ് കെജ്രിവാള്. ഗോവയിലെ ജില്ലാ പഞ്ചായത്ത് തെരഞ്ഞെടുപ്പിലെ ആം ആദ്മി പാര്ട്ടിയുടെ വിജയത്തെ പ്രശംസിച്ചുകൊണ്ട് സംസാരിക്കുകയായിരുന്നു അദ്ദേഹം.
ദക്ഷിണ ഗോവയിലെ ബെനോലിമില് ഹാന്സെല് ഫെര്ണാണ്ടസ് ആണ് ആംആദ്മിക്ക് സീറ്റ് നേടിക്കൊടുത്തത്. ''ഗോവയില് എഎപിയ്ക്കായി വിജയം കൈവരിച്ച ഹാന്സെല് ഫെര്ണാണ്ടസിന് അഭിനന്ദനങ്ങള്. കഴിഞ്ഞ തെരഞ്ഞെടുപ്പിലേക്കാള് വോട്ട് ഇത്തവണ ആംആദ്മിക്ക് ലഭിച്ചു. ഇത് ഒരു തുടക്കം മാത്രമാണ്. ആംആദ്മി പാര്ട്ടി ഗോവക്കാരുടെ വിശ്വാസത്തിനും പ്രതീക്ഷകള്ക്കും അനുസൃതമായി പ്രവര്ത്തിക്കുമെന്ന് തനിക്ക് ഉറപ്പുണ്ട്''- അരവിന്ദ് കെജ്രിവാള് ട്വീറ്റ് ചെയ്തു.
ആം ആദ്മി ഗോവ സ്റ്റേറ്റ് കണ്വീനര് രാഹുല് മംബ്രെയും പാര്ട്ടിയില് വിശ്വാസമര്പ്പിച്ചതിന് ജനങ്ങള്ക്ക് നന്ദി പറഞ്ഞുകൊണ്ട് രംഗത്തെത്തി. വോട്ടര്മാരുടെ ആവശ്യങ്ങള് നിറവേറ്റി അവരുടെ ഹൃദയം കീഴടക്കാന് ഞങ്ങള് കഠിനമായി അധ്വാനിക്കും. ആംആദ്മി പാര്ട്ടിക്ക് ഗോവയിലെ ആദ്യവിജയം നല്കിയതിന് ബെനോലിമിലെ ജനങ്ങള്ക്ക് നന്ദി എന്നാണ് രാഹുല് ട്വീറ്റ് ചെയ്തത്.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
അതേസമയം ഗോവയിലെ തദ്ദേശസ്വയംഭരണസ്ഥാപനങ്ങളിലേക്കുളള തെരഞ്ഞെടുപ്പില് ബിജെപി വന് വിജയമാണ് കൈവരിച്ചത്. 49 സീറ്റുകളില് 32 സീറ്റുകളും ബിജെപി നേടി. പ്രതിപക്ഷപാര്ട്ടിയായ കോണ്ഗ്രസിന് നാല് സീറ്റുകള് മാത്രമാണ് ലഭിച്ചത്.