ചെന്നൈ: ഡിഎംകെ നേതാവ് എം. കെ. സ്റ്റാലിന്റെ മകളുടെ വീട്ടിലും മരുമകന്‍ ശബരീശന്റെ ഉടമസ്ഥതയിലുളള സ്ഥാപനങ്ങളിലും ആദായ നികുതി വകുപ്പ് റെയ്ഡ്. സ്റ്റാലിന്റെ മകള്‍ സെന്താമരയുടെ ചെന്നൈയ്ക്ക് സമീപം നീലാങ്കരയിലെ വീട്ടില്‍ നിന്നാണ് റെയ്ഡ് ആരംഭിച്ചത്. പിന്നീട് ശബരീശനുമായി ബന്ധപ്പെട്ട നിരവധി സ്ഥലങ്ങളില്‍ റെയ്ഡ് നടന്നു. തമിഴ്‌നാട് നിയമസഭാ തെരഞ്ഞെടുപ്പ് നടക്കാന്‍ നാല് ദിവസം മാത്രമുളളപ്പോഴാണ് റെയ്ഡ്.
തെരഞ്ഞെടുപ്പുമായി ബന്ധപ്പെട്ട് പണം സമാഹരിക്കുന്നതും വിതരണം ചെയ്യുന്നതുമായ വിഷയങ്ങളില്‍ ശബരീശന് പങ്കുണ്ടെന്നാണ് ആദായനികുതി വകുപ്പ് ആരോപിക്കുന്നത്. വ്യക്തമായ തെളിവുകള്‍ ലഭിച്ചിട്ടുണ്ട് അതിന്റെ അടിസ്ഥാനത്തിലാണ് റെയ്‌ഡെന്നും ആദായനികുതി വകുപ്പ് വ്യക്തമാക്കി.
കേന്ദ്രമന്ത്രി അമിത് ഷായുടെ മകന്‍ ജെയ് ഷായുടെ സമ്പത്തില്‍ ഗണ്യമായ വര്‍ധനയുണ്ടെന്ന് കഴിഞ്ഞ ദിവസം കോയമ്പത്തൂരില്‍ നടന്ന റാലിയില്‍ സ്റ്റാലിന്റെ മകനും ഡിഎംകെ നേതാവുമായ ഉദയനിധി സ്റ്റാലിന്‍ ആരോപിച്ചതിനുപിന്നാലെയാണ് റെയ്ഡ്. തെരഞ്ഞെടുപ്പിനു മുന്നോടിയായി ഡിഎംകെക്കെതിരെ തെറ്റായ പ്രചരണങ്ങള്‍ നടത്താനാണ് നേതാക്കളുടെ വീടുകളിലെ റെയ്ഡ് എന്ന് ഡിഎംകെ നേതാക്കള്‍ പ്രതികരിച്ചു.
