ഡല്‍ഹി: കൊവിഡ് വ്യാപനം രൂക്ഷമായതിനെത്തുടര്‍ന്ന് ഡല്‍ഹിയില്‍ ലോക്ക്ഡൗണ്‍ പ്രഖ്യാപിച്ചു. ഇന്ന് രാത്രി 10 മണി മുതല്‍ ഏപ്രില്‍ 26-വരെയാണ് ലോക്ക്ഡൗണ്‍ പ്രഖ്യാപിച്ചിരിക്കുന്നത്. ലോക്ക്ഡൗണ്‍ പ്രഖ്യാപിച്ച ദിവസങ്ങളില്‍ അവശ്യ സേവനങ്ങള്‍ മാത്രമേ അനുവദിക്കുകയുളളുവെന്ന് ഡല്‍ഹി മുഖ്യമന്ത്രി അരവിന്ദ് കെജ്രിവാള് പറഞ്ഞു.
ഇപ്പോള്‍ ലോക്ക്ഡൗണ്‍ പ്രഖ്യാപിച്ചില്ലെങ്കില്‍ നാം വലിയൊരു വിപത്തിനെ അഭിമുഖീകരിക്കേണ്ടി വരും. ഡല്‍ഹിയുടെ സ്ഥിതിഗതികള്‍ കണക്കിലെടുത്താണ് കടുത്ത തീരുമാനങ്ങളെടുക്കുന്നത്. ലോക്ക്ഡൗണ്‍ ദിവസങ്ങളില്‍ മരുന്നും കിടക്കകളും സജ്ജമാക്കുന്നതിനായി ഉപയോഗിക്കും. എല്ലാവരും കൊവിഡ് മാര്‍ഗനിര്‍ദേശങ്ങള്‍ പൂര്‍ണമായി പാലിക്കണമെന്നും അരവിന്ദ് കെജ്രിവാള് പറഞ്ഞു.
അന്യസംസ്ഥാന തൊഴിലാളികള്‍ ഡല്‍ഹി വിട്ടുപോകരുത് ഇത് ചെറിയൊരു ലോക്ക്ഡൗണാണ്. സര്‍ക്കാര്‍ തൊഴിലാളികളെ സംരക്ഷിക്കുമെന്ന് മുഖ്യമന്ത്രി ഉറപ്പുനല്‍കി. കഴിഞ്ഞ ഇരുപത്തിനാല് മണിക്കൂറിനിടെ 23,500 പുതിയ കേസുകളാണ് ഡല്‍ഹിയില്‍ റിപ്പോര്‍ട്ട് ചെയ്തത്.
