തിരുവനന്തപുരം: സംസ്ഥാനത്ത് ഇന്ന് 26,011 പേര്‍ക്ക് കൂടി കൊവിഡ് സ്ഥിരീകരിച്ചു. കോഴിക്കോട് 3019, എറണാകുളം 3291, മലപ്പുറം 3278, തൃശ്ശൂര്‍ 2450, ആലപ്പുഴ 1994, പാലക്കാട് 1729, കോട്ടയം 1650, കണ്ണൂര്‍ 1469, കൊല്ലം 1311, കാസര്‍ഗോഡ് 1139, പത്തനംതിട്ട 428, ഇടുക്കി 407, വയനാട് 325 എന്നിങ്ങനെയാണ് വിവിധ ജില്ലകളില്‍ രോഗം സ്ഥിരീകരിച്ചത്. കഴിഞ്ഞ ഇരുപത്തിനാല് മണിക്കൂറിനിടെ 96,298 സാമ്പിളുകളാണ് പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് 27% ആണ്. ഇന്ന് സംസ്ഥാനത്ത് കൊവിഡ് ബാധിച്ച് മരിച്ചത് 45 പേരാണ്. ഇതോടെ കൊവിഡ് മൂലം മരിച്ചവരുടെ എണ്ണം 5450 ആയി. സംസ്ഥാനത്ത് ആകെ രോഗം സ്ഥിരീകരിച്ചത് 15,82,471 പേര്‍ക്കാണ്. 13,13,109 പേര്‍ രോഗമുക്തി നേടി.
അതേസമയം, കൊവിഡ് വ്യാപനം രൂക്ഷമായ സാഹചര്യത്തില്‍ സംസ്ഥാനത്ത് നിയന്ത്രണങ്ങള്‍ കടുപ്പിക്കുകയാണ് ആരോഗ്യവകുപ്പ്. നാളെ മുതല്‍ ഞാറയാഴ്ച്ച വരെയാണ് ലോക്ക്ഡൗണിനു സമാനമായ നിയന്ത്രണങ്ങളേര്‍പ്പെടുത്തിയിരിക്കുന്നത്. സംസ്ഥാനത്ത് രണ്ടാഴ്ച്ചയായി നടത്തിവരുന്ന വാരാന്ത്യ നിയന്ത്രണങ്ങള്‍ക്കു സമാനമായിരിക്കും പുതിയ നിയന്ത്രണങ്ങള്‍. അവശ്യവസ്തുക്കള്‍ വില്‍ക്കുന്ന കടകള്‍ക്ക് മാത്രമാണ് പ്രവര്‍ത്തിക്കാന്‍ അനുമതിയുണ്ടാവുക. ഈ ദിവസങ്ങളില്‍ അവശ്യവിഭാഗങ്ങളില്‍ ജോലി ചെയ്യുന്നവര്‍ക്ക് മാത്രമാണ് യാത്ര ചെയ്യാന്‍ അനുമതിയുണ്ടാവുക. നിയന്ത്രണങ്ങള്‍ ലംഘിക്കുന്നവര്‍ക്കെതിരെ ദുരന്തനിവാരണ നിയമപ്രകാരം കേസെടുക്കും.
ഹോട്ടലുകളിലും റസ്‌റ്റോറന്റുകളിലും ഇരുന്ന് ഭക്ഷണം കഴിക്കാനാവില്ല. രാത്രി ഒന്‍പത് വരെ പാര്‍സല്‍ സര്‍വ്വീസ് അനുവദിക്കും. രാവിലെ 10 മുതല്‍ ഒരു മണിവരെയാണ് ബാങ്കുകളുടെ പ്രവര്‍ത്തനസമയം. വിവാഹാഘോഷങ്ങളില്‍ 50 പേരും സംസ്‌കാരച്ചടങ്ങുകളില്‍ ഇരുപത് പേരെയും അനുവദിക്കും. സിനിമാ സീരിയല്‍ ചിത്രീകരണം അനുവദിക്കില്ല.
