കൊറോണ വൈറസ് കുട്ടികളെ ബാധിക്കുമെന്ന് മുന്നറിയിപ്പിനെ തുടർന്ന് സിംഗപ്പൂരിൽ സ്കൂളുകൾ അടക്കും. ബുധനാഴ്ച മുതലാണ് സ്കൂളുകൾക്ക് അവധി നൽയിരിക്കുന്നത്. പ്രൈമറി, സെക്കൻഡറി സ്കൂളുകളും ജൂനിയർ കോളേജുകളും ഓൺലൈൻ പഠനത്തിലേക്ക് മാറണമെന്നാണ് നിർദ്ദേശം. മെയ് 28 വരെയാണ് സ്കൂളുകൾ അടക്കാൻ തീരുമാനിച്ചത്.
ആരോഗ്യമന്ത്രി ഓങ്‌ യെ കുങ് ഓൺലൈൻ വാർത്താസമ്മേളനത്തിലാണ് ഇക്കാര്യം അറിയിച്ചത്. കൊവിഡിന്റെ ഇന്ത്യൻ വകഭേദമായ B.1.617 കുട്ടികളെ കൂടുതലായി ബാധിക്കാൻ സാധ്യതയുണ്ടെന്ന് ആരോഗ്യമന്ത്രി വ്യക്തമാക്കി. ഇക്കാര്യം മെഡിക്കൽ സർവീസസ് ഡയറക്ടർ മുന്നറിയിപ്പ് നൽകിയതായും കുങ് പറഞ്ഞു. ഇത് കൂടുതൽ ആശങ്കയുണ്ടാക്കുന്നുണ്ടെന്ന് വിദ്യാഭ്യാസ മന്ത്രി ചാൻ ചുൻ സിംഗ് വാർത്താ സമ്മേളനത്തിൽ പറഞ്ഞു. രോഗം ബാധിച്ച കുട്ടികളുടെ നിലഗുരുതരമല്ലെന്നും അദ്ദേഹം പറഞ്ഞു. 16 വയസ്സിന് താഴെയുള്ള വിദ്യാർത്ഥികൾക്ക് പ്രതിരോധ കുത്തിവയ്പ്പ് നൽകാനുള്ള പദ്ധതികൾ ആസൂത്രണം ചെയ്തെന്നും വിദ്യാഭ്യാസ മന്ത്രി വ്യക്തമാക്കി.
പുതിയ സാഹചര്യത്തിൽ സ്കൂളുകൾ അടക്കാൻ തായ്വാനും തീരുമാനിച്ചിട്ടുണ്ട്. കഴിഞ്ഞ ദിവസം തായ്വാനിൽ 333 പേർക്ക് കൊവിഡ് രോഗം സ്ഥിരീകരിച്ചിരുന്നു.
