ഡല്ഹി: സംസ്ഥാനത്തെ പ്ലസ് വണ് പരീക്ഷാ നടത്തിപ്പ് ഹൈക്കോടതിയുടെ പരിഗണനക്ക് വിട്ട് സുപ്രീം കോടതി. പരീക്ഷ റദ്ദാക്കണമെന്ന് ആവശ്യപ്പെടുന്ന വിദ്യാര്ഥികളോട് ഹൈക്കോടതിയെ സമീപിക്കാനാണ് സുപ്രീം കോടതിയുടെ നിര്ദേശം. വിദ്യാര്ഥികളുടെ പരീക്ഷാ നടത്തിപ്പില് ഏതെങ്കിലും തരത്തില്ലുള്ള വീഴ്ചകള് ഉണ്ടായാല് അതിന്റെ ഉത്തരവാദിത്വം സര്ക്കാരിന് മാത്രമായിരിക്കുമെന്നും സുപ്രീം കോടതി കൂട്ടിച്ചേര്ത്തു. അതോടൊപ്പം പ്ലസ് ടു പരീക്ഷയുടെ ഫലം ജൂലൈ 31 നകം പ്രസിദ്ധീകരിക്കാനും നിര്ദേശം നല്കിയിട്ടുണ്ട്.
കഴിഞ്ഞ ദിവസം പ്ലസ് വണ് പരീക്ഷ റദ്ദാക്കില്ലെന്ന് സര്ക്കാര് സുപ്രീം കോടതിയെ അറിയിച്ചിരുന്നു. സെപ്റ്റംബറില് പരീക്ഷ നടത്താന് സംസ്ഥാനം സജ്ജമാണെന്നും സുപ്രീം കോടതിയില് സമര്പ്പിച്ച സത്യവാങ്മൂലത്തില് വ്യക്തമാക്കിയിരുന്നു. പരീക്ഷ ഒഴിവാക്കുന്നത് കുട്ടികളുടെ ഭാവിയെ ബാധിക്കുമെന്നാണ് സര്ക്കാരിന്റെ വാദം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
സെപ്റ്റംബര് 6 മുതല് 16 വരെ പ്ലസ് വണ് പരീക്ഷ നടത്താനാണ് സംസ്ഥാന സര്ക്കാര് തീരുമാനിച്ചിരിക്കുന്നത്. എന്നാല് കൊവിഡ് വ്യാപനത്തിന്റെ പശ്ചാത്തലത്തില് പരീക്ഷ റദ്ദാക്കണമെന്ന് ആവശ്യപ്പെട്ട് ഒരു വിഭാഗം വിദ്യാര്ത്ഥികളും രക്ഷാകര്ത്താക്കളും സുപ്രീം കോടതിയെ സമീപിച്ചിരുന്നു. ഇതേ തുടര്ന്ന് ജസ്റ്റിസ് എ.എം ഖാന്വില്ക്കര് അദ്ധ്യക്ഷനായ സുപ്രീം കോടതി ബെഞ്ച് സര്ക്കാരിന്റെ നിലപാട് തേടിയിരുന്നു.