തിരുവനന്തപുരം: കെ മുരളീധരന്‍ അന്ധവിശ്വാസങ്ങളുടെ കൂടാരമാണെന്ന് പൊതു വിദ്യാഭ്യാസ വകുപ്പ് മന്ത്രി വി ശിവന്‍കുട്ടി. കഴിഞ്ഞ ദിവസം മുഖ്യമന്ത്രി പിണറായി വിജയനെതിരെ കെ മുരളീധരന്‍ എം പി നടത്തിയ പരാമര്‍ശങ്ങളെ കുറിച്ച് പ്രതികരിക്കുകയായിരുന്നു മന്ത്രി വി ശിവന്‍കുട്ടി. മുഖ്യമന്ത്രിക്കെതിരായ മുരളീധരന്റെ പ്രസ്താവനക്ക് പിന്നില്‍ എന്ത് യുക്തിയാണുള്ളത്, ലോകത്താകെ കൊവിഡ്‌ മഹാമാരി പടര്‍ന്നുപിടിക്കാന്‍ കാരണം മുഖ്യമന്ത്രി പിണറായി വിജയന്‍ ഭരിക്കുന്നത് കൊണ്ടാണ് എന്നാണ് മുരളീധരന്‍ പറഞ്ഞത്. ഒട്ടും ശാസ്ത്രീയമായമല്ലാത്ത, വെറും അബദ്ധജഡിമായ പ്രസ്താവനയാണ് മുരളീധരന്‍ നടത്തിയിരിക്കുന്നത്. ഇതിനുപിന്നില്‍ എന്തു യുക്തിയാണുള്ളത്- മന്ത്രി വി ശിവന്‍കുട്ടി ചോദിച്ചു.
അന്ധവിശ്വാസങ്ങളുടെ കാര്യത്തില്‍ കെ മുരളീധരന്‍ സംഘപരിവാര്‍ കൂടാരത്തിലാണ്. ചൂട് കൂടിയ സ്ഥലത്ത് കൊവിഡ്‌ ഉണ്ടാവില്ല എന്ന് പറഞ്ഞയാളാണ് മുരളീധരന്‍. ഫ്യൂഡല്‍ മാടമ്പിമാരെപ്പോലെ സംസാരിക്കുന്ന കെ മുരളീധരന്‍ പ്രസ്താവനകള്‍ ഇറക്കുന്നതിനുമുന്‍പ് തന്നില്‍ കാവിക്കറ പുരണ്ടിട്ടുണ്ടോ എന്നറിയാന്‍ കണ്ണാടി നോക്കുന്നത് നന്നായിരിക്കുമെന്നും മന്ത്രി ശിവന്‍കുട്ടി പറഞ്ഞു. അല്ലെങ്കില്‍ കേരളത്തിലെ ചിന്താശേഷിയുള്ള യുവതലമുറയോട് കാര്യങ്ങള്‍ വ്യക്തമാക്കാന്‍ ആവശ്യപ്പെട്ടു.
