തിരുവനന്തപുരം: ഒമൈക്രോണ് സാമൂഹിക വ്യാപനം സംഭവിച്ചുവെന്ന ആരോഗ്യ വകുപ്പിന്റെ റിപ്പോര്ട്ട് പുറത്ത് വന്നതിന്റെ പിന്നാലെ സിപിഎം സംസ്ഥാന സമ്മേളനം മാറ്റിവെക്കാന് തീരുമാനിച്ചതായി റിപ്പോര്ട്ടുകള്. മാര്ച്ച് ഒന്ന് മുതല് നാല് വരെ ഏറണാകുളം ജില്ലയില് വെച്ചാണ് സംസ്ഥാന സമ്മേളനം നടത്താന് സി പി എം ആദ്യം തീരുമാനിച്ചത്. എന്നാല് ഫെബ്രുവരി പകുതിയോടെ കൊവിഡ് രൂക്ഷമാകുമെന്ന റിപ്പോര്ട്ട് വന്നതിന്റെ അടിസ്ഥാനത്തിലാണ് സമ്മേളനം നീട്ടിവെക്കാന് സിപിഎം സെക്രട്ടറിയേറ്റ് തീരുമാനിച്ചത്. പാര്ട്ടി സമ്മേളനം മാര്ച്ച് അവസാനത്തേക്ക് നടത്താനാണ് നേതാക്കള് ആലോചിക്കുന്നത്.
ഏപ്രില് ആദ്യ ആഴ്ച നടത്തുന്ന പാര്ട്ടി കോണ്ഗ്രസ് മാറ്റുന്ന കാര്യത്തില് ഇതുവരെ തീരുമാനമായിട്ടില്ല. ഏപ്രില് മാസത്തെ സാഹചര്യം വിലയിരുത്തി കൂടിയാലോചനകള്ക്ക് ശേഷം തീരുമാനം എടുക്കാമെന്നാണ് നേതാക്കള് കണക്ക് കൂട്ടുന്നത്. കൊവിഡ് വ്യാപനം രൂക്ഷമായ സാഹചര്യത്തില് ജില്ലാ സമ്മേളനങ്ങള് നടത്തിയതിനെതിരെ രൂക്ഷവിമര്ശനം ഉയര്ന്ന സാഹചര്യത്തിലാണ് സംസ്ഥാന സമ്മേളനത്തിന്റെ കാര്യത്തില് പാര്ട്ടി ഇത്തരമൊരു തീരുമാനം കൈകൊണ്ടിരിക്കുന്നതെന്നാണ് കരുത്തുന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കൊവിഡിനെ തുടര്ന്ന് കാസര്കോട്, തൃശൂര് ജില്ലാ സമ്മേളനങ്ങള് ചുരുക്കുകയും ആലപ്പുഴ ജില്ലാ സമ്മേളനം മാറ്റിവെക്കുകയും ചെയ്തിരുന്നു. തിരുവനന്തപുരം, തൃശ്ശൂര് ജില്ലകളില് നടത്തിയ തിരുവാതിരയും, പാലക്കാട് നടത്തിയ കന്നുപൂട്ട് മത്സരവുമാണ് ജില്ലാ സമ്മേളനങ്ങളുമായി ബന്ധപ്പെട്ട് പാര്ട്ടിക്ക് ഏറ്റവും അധികം വിമര്ശനങ്ങള് ഏറ്റുവങ്ങേണ്ടി വന്ന പൊതുപരിപാടികള്.